Լատվիայում մահացել է հարավկորեացի ռեժիսոր Կիմ Կի Դուկը։ Այս մասին հայտնում է Delfi պորտալը դեկտեմբերի 11-ին։
Կաննի, Վենետիկի և Բեռլինի կինոփառատոնների դափնեկիր, ռեժիսոր Կիմ Կի Դուկը Լատվիա է ժամանել նոյեմբերի 20-ին, իսկ դեկտեմբերի 5-ից սկսած անհասանելի էր, — Delfi պորտալին պատմել է ArtDocFest/Rīga-ի տնօրեն Վիտալի Մանսկին: Այսօր տեղեկություն է ստացվել այն մասին, որ ռեժիսորը մահացել է COVID-19 բարդություններից։ Նա 59 տարեկան էր:
Նշվում է, որ կինեմատոգրաֆիստն ժամանել է Լատվիա՝ Յուրմալայում կացության կարգավիճակ ստանալու և տուն ձեռք բերելու համար, սակայն չի ներկայացել նախատեսված հանդիպմանը:
Հարավկորեացի այս ռեժիսորի շնորհիվ Արևմուտքը ճանաչեց կորեական կինոն ու բացահայտեց Հարավային Կորեան: Կիմ Կի Դուկը նկարահանել է այնպիսի ֆիլմեր, ինչպիսիք են «Աղեղ», «Գարուն, ամառ, աշուն… և կրկին գարուն», «Դատարկ տուն», «Պիետա», և այլ: Նա նկարահանել է քսան ֆիլմ, որոնցից մի քանիսը դարձել են միջազգային հեղինակավոր փառատոների դափնեկիրներ:
Հիշեցնենք, որ 2014 թվականի «Ոսկե Ծիրան» կինոփառատոնի շրջանակներում Կիմ Կի Դուկը ժամանել էր Հայաստան: Ռեժիսորը խոստովանում էր, որ նախքան Հայաստան գալը երկրի մասին ոչինչ չգիտեր: Սակայն Երևանում գտնվելու ընթացքում ազատ ժամանակն օգտագործել է` քայլելով Երևանի փողոցներով: «Ոսկե ծիրան» կինոփառատոնի շրջանակներում Կիմ Կի Դուկին է հանձնվել «Փարաջանովյան թալեր» մրցանակը, որը տրվում է համաշխարահային կինոյում ունեցած վաստակի համար:
