Նոյեմբերի 14–15-ին կայանալիք Երևանի կինոարդյունաբերության ֆորում 2026-ի ծրագրով նախատեսված են վեց թեմատիկ պանել, բացման քննարկում և Հայաստանի կինոարդյունաբերության 2026–2030 թվականների զարգացման ճանապարհային քարտեզին նվիրված եզրափակիչ լիագումար նիստ։
KinoPress-ն ավելի վաղ հայտնել էր, որ «Հայ կինոյի զարգացման համաժողով 2026» ծրագրի համար նախատեսվել է 9 մլն 12 հազար դրամ պետական ֆինանսավորում, մինչդեռ այդ պահին քննարկումների ամբողջական թեմաներն ու բանախոսների կազմը դեռ հայտնի չէին։
«Համաժողովի արդյունքներով կմշակվի ռազմավարական առաջարկությունների փաթեթ և 2026–2030 թվականների ճանապարհային քարտեզի շրջանակ, որոնք կներկայացվեն շահագրգիռ կողմերին, ոլորտում առկա կազմակերպություններին և պետական կառույցներին»,— նշվում է կազմակերպիչների տարածած մամուլի հաղորդագրությունում։
Ֆորումը կբացվի «Կինոն որպես մշակութային արժեք և մեղմ ուժ» քննարկմամբ։ Այն կմոդերավորի կինոքննադատ, կինոռեժիսոր և պրոդյուսեր, ԹՈՒՄՈ-ի կինոծրագրի համակարգող Րաֆֆի Մովսիսյանը։ Բանախոսներն են վավերագրական կինոռեժիսոր Արման Երիցյանը, անիմացիոն ռեժիսոր, նկարիչ, սցենարիստ և անիմատոր Նաիրա Մուրադյանը և կինոռեժիսոր Դիանա Կարդումյանը։
Առաջին պանելը նվիրված կլինի կինոյի ֆինանսավորմանը, պետական քաղաքականությանը, իրավական դաշտին և մասնավոր ներդրումներին։ Քննարկումը կմոդերացնի կինոռեժիսոր և պրոդյուսեր, Հայաստանի անիմացիայի մասնագիտական գիլդիայի հիմնադիր-նախագահ Արմինե Անդան։ Բանախոսների թվում են Հայաստանի կինոյի հիմնադրամի տնօրեն Դավիթ Բանուչյանը, Էստոնիայի կինոյի ինստիտուտի գործադիր տնօրեն և վարչության անդամ Էդիթ Սեպը, Եվրոպական աուդիովիզուալ աստղադիտարանի իրավական տեղեկատվության բաժնի ղեկավարի տեղակալ Սոֆի Վալեն և Եվրոպական կինոգործակալությունների տնօրենների ասոցիացիայի՝ EFAD-ի գլխավոր քարտուղար Սևարա Իրգաչևան։
Երկրորդ պանելի թեման է «Հայաստանը՝ որպես կինոարտադրության երկիր»։ Այն կմոդերացնի կինոպրոդյուսեր և Երևանի կինոարդյունաբերության ֆորումի ղեկավար Անահիտ (Աննա) Զաքարյանը։ Բանախոսների թվում են Հորդանանի թագավորական կինոհանձնաժողովի արտադրական ծառայությունների ղեկավար Բաշար Աբու Նուվարը, Նորվեգիայից գործադիր ղեկավար և ազգային կինոհանձնակատար, Ֆիլմհանձնակատարների միջազգային ասոցիացիայի խորհրդի անդամ Մեգան Բիթոնը, ՀՀ ԿԳՄՍ նախարարի տեղակալը (դեռ անհայտ) և The Location Guide-ի գործադիր տնօրեն Ժան-Ֆրեդերիկ Գարսիան։ Փոխնախարարի անունը կազմակերպիչների տրամադրած ծրագրում նշված չէ։
Հայկական Սփյուռքի հետ համագործակցությանը նվիրված երրորդ պանելը կմոդերավորի անիմացիոն և կինոռեժիսոր, «ՌեԱնիմանիա» միջազգային անիմացիոն կինոփառատոնի հիմնադիր Վրեժ Քասունին։ Քննարկմանը կմասնակցեն FANGORIA Studios-ի ավագ փոխնախագահ Արմեն Աղաեյանը, կինոռեժիսոր և դերասան Սերժ Ավետիքյանը, «Էմմի» մրցանակակիր դերասան և կինոռեժիսոր Մայքլ Գուրջյանը և ՀՀ սփյուռքի գործերի գլխավոր հանձնակատար Զարեհ Սինանյանը։
Ֆորումի երկրորդ օրը կսկսվի կրթության և մասնագիտական հմտությունների զարգացման պանելով։ Այն կմոդերացնի օպերատոր, Հայաստանի կինոօպերատորների գիլդիայի նախագահ Մկո Մալխասյանը։ Բանախոսներն են New York Film Academy Kazakhstan-ի տնօրեն Իգոր Տորգեսոնը, նույն կազմակերպության նախագծերի ղեկավար Մունիրա Դերբիսալին, Երևանի թատրոնի և կինոյի պետական ինստիտուտի ռեկտոր Սառա Նալբանդյանը և UCLA-ի կինոյի պատմաբան, արխիվագետ և դասախոս Զարեհ Արևշատյանը։
Հինգերորդ պանելը կանդրադառնա միջազգային համատեղ արտադրությանը և փառատոնային ռազմավարությանը։ Մոդերատորը Երևանի թատրոնի և կինոյի պետական ինստիտուտի կինոյի, մուլտիմեդիայի և անիմացիայի ամբիոնի վարիչ Կարինե Սիմոնյանն է։ Բանախոսների թվում են Արմինե Անդան, Վլադիսլավ Շլեսիցկիի անվան կինոհիմնադրամի հիմնադիր-նախագահ և DOC LAB POLAND-ի ղեկավար Ադամ Շլեսիցկին, Բուխարեստի Animest միջազգային անիմացիոն կինոփառատոնի համահիմնադիր Լիգիա Սոարեն, ինչպես նաև «Ոսկե ծիրան» Երևանի միջազգային կինոփառատոնի տնօրեն և գեղարվեստական ղեկավարը։ Վերջինիս անունը ծրագրում նշված չէ։
Վեցերորդ պանելի թեման արհեստական բանականությունն ու տեխնոլոգիաներն են կինոյում և անիմացիայում։ Այն կմոդերացնի անիմացիոն ռեժիսոր և արտ-տնօրեն, OnOff Studio-ի համահիմնադիր Տիգրան Առաքելյանը։ Քննարկմանը կմասնակցեն Սոֆի Վալեն, Հյուսիսային Մակեդոնիայի կինոգործակալության տնօրեն Սաշկո Փոթեր Միցևսկին, Հայաստանի կինոյի հիմնադրամի տնօրեն Դավիթ Բանուչյանը և Point of Law-ի կառավարող գործընկեր և գործադիր տնօրեն, իրավաբան Սանասար Գևորգյանը։
Ֆորումը կավարտվի Հայաստանի կինոարդյունաբերության 2026–2030 թվականների ճանապարհային քարտեզին նվիրված լիագումար նիստով։ Նախատեսվում է ամփոփել վեց պանելների հիմնական առաջարկությունները, գնահատել ծրագրի իրագործելիությունը և քննարկել մինչև 2030 թվականը հնարավոր քայլերը։ Ամփոփիչ զեկույցը կներկայացնի ֆորումի հատուկ հյուր Գիլա Կլարա Կեսուն։ Եվրոպական համագործակցության հեռանկարների վերաբերյալ մեկնաբանությամբ նախատեսվում է հանդես գալ «Ստեղծագործ Եվրոպա» հայաստանյան գրասենյակի համակարգող Անի Հովսեփյանին, որի մասնակցությունը դեռ հաստատման փուլում է։ Եզրափակիչ քննարկմանը նախատեսված է նաև Հայաստանի կինոյի հիմնադրամի տնօրեն Դավիթ Բանուչյանի, ՀՀ ԿԳՄՍ նախարարի տեղակալի (դեռ անհայտ) և Զարեհ Սինանյանի մասնակցությունը։
Երևանի կինոարդյունաբերության ֆորում 2026-ը կանցկացվի DoubleTree by Hilton Yerevan City Centre հյուրանոցում։ Այն կազմակերպում են Հայ մշակույթի և արվեստի միջազգային համակարգման խորհուրդը (ICA) և Հայաստանի կինոյի հիմնադրամը՝ ՀՀ կրթության, գիտության, մշակույթի և սպորտի նախարարության հովանու ներքո։ Կազմակերպիչները նշում են, որ ծրագրում հնարավոր են փոփոխություններ։
