Երգիչ Արամ Ասատրյանի կյանքին նվիրված «Արամ Ասատրյան» գեղարվեստական ֆիլմի պրեմիերան նախատեսված է 2027 թվականի փետրվարի 4-ին։ Նկարահանումներն արդեն մեկնարկել են, իսկ երգչի կերպարը կմարմնավորի երգիչ և բլոգեր Միսակ Ոսկանյանը։ Նախագծի հեղինակները ներկայացրել են նաև ֆիլմի պաշտոնական պաստառը։
«Նրա երգերի հետ բոլորս մեր հիշողություններն ունենք։ Հիմա ուզում ենք ձեզ պատմել այդ երգերի հետևում կանգնած մարդու պատմությունը», — ֆիլմի պաշտոնական պաստառը ներկայացնելիս գրել է պրոդյուսեր Ռաֆայել Թադևոսյանը։
Ֆիլմի գործողությունները կծավալվեն Արամ Ասատրյանի կյանքի տարբեր ժամանակահատվածներում՝ ներկայացնելով ընտանիքի սոցիալական դժվարությունները, երաժշտական գործունեության սկիզբը և 1990-ականների Հայաստանի իրականությունը։ Պատմության առանցքային թեմաներից է լինելու հայրենիքը լքելու որոշումը, ինչպես նաև հաջողության հասնելու ճանապարհին երգչի անձնական ապրումներն ու ընտանեկան պատասխանատվությունը։
Ֆիլմի ռեժիսորն Արամ Շահբազյանն է, որը հայտնի է «Փրկության քարտեզը» վավերագրական ֆիլմով և «Մոսկվիչ, իմ սեր» գեղարվեստական նախագծով։ Պրոդյուսերներն են Ռաֆայել Թադևոսյանն ու Արտաշ Ասատրյանը, իսկ սցենարի հեղինակները՝ Բաբկեն Երանոսյանն ու Ռաֆայել Թադևոսյանը։ Ֆիլմն արտադրվում է «Կինոդարան»-ի կողմից։
«ԿինոՊրես»-ը դեռ 2025 թվականի հունիսին հայտնել էր ֆիլմի նախապատրաստման մասին։ Այդ ժամանակ երգչի որդին՝ Արտաշ Ասատրյանը, տեղեկացրել էր, որ նախատեսվում է անդրադառնալ հոր մանկությանը, պատանեկությանը և ստեղծագործական գործունեությանը։ Նկարահանումները նախատեսվում էր իրականացնել Էջմիածնում և արտերկրում։
Ավելի վաղ Արտաշ Ասատրյանը ցանկություն էր հայտնել ֆիլմում ներգրավել նաև հոր ընկերներին ու գործընկերներին, այդ թվում՝ Թաթա Սիմոնյանին, Արմենչիկին, Արման Հովհաննիսյանին և Արկադի Դումիկյանին։ Նա հայտնել էր նաև, որ երգչուհի Լիլիթ Կարապետյանը համաձայնել է մասնակցելու առաջարկին։ Սակայն նշված արտիստների մասնակցությունը ֆիլմի հրապարակված դերասանական կազմում առայժմ հաստատված չէ։
«Արամ Ասատրյան» ֆիլմի արտադրության մասին առաջին տեղեկությունները հրապարակվել էին 2025 թվականին։ Նախագծի իրականացումը նախատեսվում էր սկսել նույն տարվա վերջին, մինչդեռ նկարահանումների մեկնարկի մասին պաշտոնապես հայտարարվեց 2026 թվականի հոկտեմբերի 24-ին։
