2025 թվականի մայիսի 16-ին և 17-ին Կաննի Marché du Film կինոշուկայում գործող Ֆիլմարտադրողների Համահայկական Ֆեդերացիայի (ՖԱՀՖ) տաղավարը, «Գագիկ Ծառուկյան» հիմնադրամի հովանավորությամբ, շարունակել է իր աշխատանքը՝ հանդիպումներով և ֆիլմերի պրեզենտացիաներով։
Տաղավարի աշխատանքները ներառել են մի շարք հանդիպումներ, այդ թվում՝ Վենետիկի կինոփառատոնի ղեկավարության հետ։ Ֆեդերացիայի պատվիրակության կազմում հանդիպմանը մասնակցել են Անի Գալստյանը, Էսթեր Սերաֆինին, Սաթիկ Ստեփանյանը, Արամ Մանուկյանը և Հովհաննես Գալստյանը։ Հանդիպման ընթացքում, ըստ տարածված տեղեկատվության, ներկայացվել են Ֆեդերացիայի գործունեության նպատակները, կինոնախագծերը և միջազգային գործընկերային հնարավորությունները։
Հանդիպումներ տեղի են ունեցել նաև Հնդկաստանի, Եգիպտոսի, Լյուքսեմբուրգի, Նիդերլանդների, Չեխիայի, Գերմանիայի, Էստոնիայի և Բալկանյան երկրների համատեղ տաղավարներում։
Տաղավարում կազմակերպվել են տասնյակ մասնագիտական հանդիպումներ՝ հեղինակային իրավունքի մասնագետների, միջազգային վաճառքի գործակալների, ռեժիսորների, պրոդյուսերների և ոլորտի այլ մասնագետների մասնակցությամբ։ Այդ հանդիպումների բովանդակության կամ արդյունքների վերաբերյալ լրացուցիչ տեղեկություններ չեն տրամադրվում։
Մայիսի 17-ին Ֆեդերացիայի տաղավարում ներկայացվել են «Տատիկիս վարսերը» և «Դոլի» ֆիլմերը։ Նույն օրը անցկացվել է KIRK մրցանակաբաշխությունը, որի շրջանակում «Ոսկե Քըրք» մրցանակ է շնորհվել Նորա Արմանիին՝ որպես ՖԱՀՖ դեսպան և կինոարվեստում ունեցած գործունեության համար։
Երեկոյան տաղավարում տեղի է ունեցել հովանավորի՝ «Գագիկ Ծառուկյան» հիմնադրամի գործունեության շնորհանդեսը։ Հանդիսատեսին ներկայացվել է նաև նախաձեռնությունը՝ ուղղված աշխարհում ամենաբարձր Հիսուս Քրիստոսի արձանի կառուցման նախագծին։ Օրվա ավարտը ուղեկցվել է հյուրընկալությամբ։
