Հայաստանի կառավարությունը «Սահակյանց» անիմացիոն ստուդիային զրկում է զբաղեցրած տարածքից, ասվում է ստուդիայի Facebook-յան էջում:
«ՀՀ կառավարության որոշման համաձայն` Սահակյանց ստուդիային զրկում են տարածքից, որը տրամադրվել էր անհատույց 2014-ին կնքված պայմանագրով»,- ասված է հաղորդագրությունում:
Ստուդիան նաև տեղեկացրել է, որ ստեղծված իրավիճակի պատճառով նոր ուսումնական տարում ընդունելությունն անորոշ ժամկետով կհետաձգվի:
Տարածքը «Ռոբերտ Սահակյանցի անվան անիմացիոն արվեստանոց» հասարակական կազմակերպությանը անհատույց տրամադրվել է Կառավարության՝ 2014 թվականի հունիսի 26-ի N 637-Ա որոշման համաձայն:
«Կառավարությանն առընթեր պետական գույքի կառավարման վարչության աշխատակազմ» պետական կառավարչական հիմնարկին ամրացված՝ Երևան քաղաքի Կենտրոն վարչական շրջանի Վարդանանց 30 հասցեում գտնվող շենքի 1-ին հարկից 115,292,000 դրամ շուկայական արժեքով, 620.3 քառ. մետր մակերեսով տարածքը հետ վերցնել «Երևանի պրոֆ. Արշավիր Շավարշյանի անվան հ. 40 հիմնական դպրոց» պետական ոչ առևտրային կազմակերպությունից և անհատույց օգտագործման իրավունքով 25 տարի ժամկետով հանձնել «Ռոբերտ Սահակյանցի անվան անիմացիոն արվեստանոց» հասարակական կազմակերպությանը»,- ասված է որոշման մեջ:
Նույն տարում կառավարության այլ որոշմամբ՝ ստուդիային է տրամադրվել 123,600,000 դրամ կենտրոնի բացման համար, որտեղ նախատեսվում էր մանկական նկարչական դպրոց, կինոթատրոն, անիմացիայի դպրոց, բուն ստուդիան, ինչպես նաև մուլտիպլիկացիայի թանգարան ունենալ:
