Ֆրանսիան կոշտ կարանտինի ռեժիմից աստիճանաբար դուրս կգա 2020 թվականի մայիսի 11-ից, սակայն ֆրանսիական կինոթատրոնները հուլիսից շուտ չեն բացվի: Այս մասին հայտարարել է երկրի նախագահ Էմանուել Մակրոնը, որը հեռուստաուղերձով հանդես է եկել ապրիլի 13-ի երեկոյան: Նրա ելույթից պարզ էր, որ ցանկացած զանգվածային միջոցառումներ, այդ թվում՝ ավանդական կինոդիտումները, կմնան արգելքի տակ՝ չնայած կարանտինային միջոցառումների հետագա թուլացմանը:
Կինոթատրոնների բացման եւ զանգվածային միջոցառումների անցկացման թույլտվության հստակ ժամկետ չի նշվել: Սա, իր հերթին, ակնհայտ է դարձնում այն փաստը, որ Կաննի կինոփառատոնը մինչեւ հուլիսի կեսերը չի հաջողվի անցկացնել: Ըստ ինսայդերների, կազմակերպիչները հույս ունեին, որ ստուգատեսը կտեղափոխվի հունիսի վերջ եւ փորձում էին հասկանալ մասնակիցների եւ դիստրիբյուտորների շրջանում նոր ամսաթվերի վերաբերյալ տրամադրությունները: Սպասվում է, որ փառատոնի ղեկավարությունը առաջիկայում հայտարարություն կանի՝ կապված կինոստուգատեսի նոր ժամկետների հետ:
