Հայաստանի կինոյի հիմնադրամը այս տարի ևս կներկայանա սեփական տաղավարով Կաննի Marche du Film կինոշուկային: Միջազգային կինոփառատոներին, կինոշուկաներին կինոծրագրերին մասնակցության համար նախատեսված հատկացումների հաշվին Կաննի 78-րդ միջազգային կինոփառատոնին կից Marche du Film կինոշուկային մասնակցության նպատակով ՀՀ ԿԳՄՍ նախարարությիւնը Հայաստանի կինոյի հիմնադրամի հետ մարտի 31-ին կնքեց N ՄՇԴ-161-2025 դրամաշնորհի հատկացման պայմանագիր:
Կինոշուկայում ներկայանալու համար պայմանագրով ՀՀ ԿԳՄՍ նախարարությունը հատկացնում է 5 մլն. դրամ, որով Կինոյի հիմնադրամը վարձակալելու է տաղավար Palais des Festivals-ում, վարձելու է սեղան, աթոռ և լուսավորություն, տպագրելու է բաներ:
Ի տարբերություն բեռլինյան Եվրոպական կինոշուկայի այս անգամ կառույցը խուսափեց հստակ նշելու պատվիրակության կազմը և իր անելիքները հնգօրյա գործուղման շրջանակում, սակայն հայտնի է, որ հինգ օրում Կինոյի հիմնադրամի պատվիրակությունը կունենա նվազագույնը 6 «հանդիպումներ և քննարկումներ միջազգային գործընկեր կազմակերպությունների հետ»:
Ինչպես նշվում է կառույցի ներկայացված հայտում՝ Հայաստանի կինոյի հիմնադրամը Marche du Film կինոշուկային ներկայանալու է “FOCUS YOUR LENS ON ARMENIA” («Ձեր օբյեկտիվը/ոսկպնյակը կենտրոնացրեք Հայաստանի վրա») կարգախոսով: Տաղավարում ներկայացվելու են պետական ֆինանսավորում ստացած հայկական ժամանակակից ֆիլմերը, Cash Rebate ծրագիրը և Հայաստանի տեսարժան և ֆիլմնկարահանման համար գրավիչ վայրերը՝ տաղավարի դիզայնի, ֆիլմերի կատալոգի և հոլովակների միջոցով: Տաղավարը ծառայելու է ոչ միայն Կինոյի հիմնադրամի պատվիրակության, այլ նաև կինոշուկային մասնակից հայ արտադրողների գործունեությանը՝ հնարավորություն տալով վերջիններիս կազմակերպել գործնական հանդիպումներ և քննարկումներ:
Հայաստանի կինոյի հիմնադրամը համարում է, որ Կաննի կինոշուկայում ներկայացվածությունը կնպաստի հայկական կինոարվեստի միջազգային դիրքավորմանը, հայ-եվրոպական և այլ երկրների կինոարտադրողների միջև կապերի ստեղծմանը, զարգացմանը և ամրապնդմանը՝ խթանելով ոլորտի զարգացումը և միջազգային ճանաչելիությունը: Ավելի կզարգանան և կամրապնդվեն Հայաստանի կինոյի հիմնադրամի միջազգային կապերը և գործունեությունը, ինչի արդյունքում կխթանվեն հայ կինոժառանգության և ժամանակակից ֆիլմերի տարածումն ու ճանաչելիությունն աշխարհում: Ըստ Կինոյի հիմնադրամի Կաննի միջազգային կինոշուկան նաև լավագույն հարթակներից է, որտեղ նպատակային է խթանել Cash Rebate ծրագիրը:
Փաստացի այս կինոշուկայի ընթացքում Հայաստանի կինոյի հիմնադրամը ավելի շատ ներկայանալու է ֆիլմ հանձնակատարի դերում:
Երկու տարվա ընթացքում սա Կինոյի հիմնադրամի ՀՀ կառավարության կողմից դեռ չհաստատված Cash Rebate ծրագրի երրորդ միջազգային ներկայացումն է լինելու:
