ՀՀ կրթության, գիտության, մշակույթի և սպորտի նախարարությունը երկու մասնագետ է փնտրում, որոնց աշխատանքը անմիջականորեն կապված է լինելու կինեմատոգրաֆիայի ոլորտի պետական քաղաքականության և ծրագրերի իրականացման հետ։
Առաջին թափուր հաստիքը գլխավոր մասնագետի պաշտոնն է։ Այս աշխատանքը նախատեսում է մասնակցություն Հայաստանի կինոյի ոլորտի քաղաքականության ձևավորմանը՝ կինեմատոգրաֆիան կարգավորող իրավական ակտերի, ռազմավարությունների և հայեցակարգերի մշակումից մինչև պետական ծրագրերի և բյուջեի նախագծման աշխատանքներ։ Գլխավոր մասնագետը նաև աշխատելու է կինոյի ոլորտի պետական կազմակերպությունների զարգացման ծրագրերի, ոլորտային վերլուծությունների, կինոարտադրողների միջև տարածաշրջանային համագործակցության և միջազգային կապերի ուղղությամբ։
Պաշտոնի աշխատանքի կարևոր հատվածներից է նաև հայկական կինոյի միջազգային ներկայությունը․ մասնագետը պետք է ուսումնասիրի և առաջարկություններ ներկայացնի Հայաստանում և արտերկրում անցկացվող կինոփառատոներին, կինոշուկաներին և կինոհարթակներին հայ կինոգործիչների ու հայկական ֆիլմերի մասնակցության վերաբերյալ։
Այս պաշտոնի համար պահանջվում է առնվազն երկու տարվա հանրային ծառայության ստաժ կամ երեք տարվա մասնագիտական, արվեստի կամ մշակույթի ոլորտում աշխատանքային փորձ։ Հիմնական աշխատավարձը 267 072 դրամ է՝ մինչև հարկերի և պարտադիր վճարների պահումները։
Երկրորդ թափուր հաստիքը ավագ մասնագետի պաշտոնն է և ավելի շատ կենտրոնացած է կինոյի ոլորտի ծրագրերի իրականացման վրա։ Մասնագետը ներգրավվելու է նախարարության պատվերով իրականացվող դրամաշնորհային ծրագրերի մրցույթներում, ստեղծագործական ծրագրերի հաշվետվությունների ուսումնասիրման, միջազգային և հանրապետական կինոփառատոների ու այլ միջոցառումների կազմակերպման, միջազգային մշակութային համագործակցության և ոլորտային տեղեկատվության մշակման աշխատանքներում։
Այս հաստիքը կարող է հատկապես հետաքրքիր լինել այն մասնագետների համար, որոնք արդեն ունեն կինոփառատոների, մշակութային ծրագրերի, հասարակական կազմակերպությունների, կինոարտադրության կամ մշակութային կառավարման ոլորտում թեկուզ մեկ տարվա աշխատանքային փորձ։ Պաշտոնի համար պահանջվում է առնվազն մեկ տարվա հանրային ծառայության, մասնագիտական կամ արվեստի և մշակույթի ոլորտում աշխատանքային ստաժ։ Հիմնական աշխատավարձը 189 696 դրամ է՝ մինչև հարկերի և պարտադիր վճարների պահումները։
Երկու պաշտոնների համար էլ աշխատավայրը Երևանում է՝ Վազգեն Սարգսյան 3 հասցեում՝ Կառավարական տուն N 2-ում։
Մրցույթներին մասնակցելու հայտերը կարելի է ներկայացնել էլեկտրոնային եղանակով Քաղաքացիական ծառայության գրասենյակի cso.gov.am հարթակի միջոցով։ Դիմումների ընդունման վերջնաժամկետը 2026 թվականի հոկտեմբերի 12-ի ժամը 24:00-ն է։
Երկու մրցույթներն էլ բաղկացած են թեստավորման և հարցազրույցի փուլերից։ Թեստավորման համար նախատեսված մասնագիտական նյութերի թվում ներառված է նաև ՀՀ «Կինեմատոգրաֆիայի մասին» օրենքը, իսկ հարցազրույցի ընթացքում ևս ստուգվելու են կինեմատոգրաֆիայի ոլորտին վերաբերող մասնագիտական գիտելիքները։
Գլխավոր մասնագետի թեստավորումը կանցկացվի նոյեմբերի 6-ին՝ ժամը 10:00-ին, իսկ հարցազրույցը՝ նոյեմբերի 10-ին՝ ժամը 10:00-ին։ Ավագ մասնագետի թեստավորումը նախատեսված է նոյեմբերի 6-ին՝ ժամը 14:30-ին, իսկ հարցազրույցը՝ նոյեմբերի 10-ին՝ ժամը 10:30-ին։
