ՀՀ գլխավոր դատախազությունը 2026 թվականի սեպտեմբերի 29-ին պետական շահերի պաշտպանության լիազորության շրջանակում հայցադիմում է ներկայացրել Հակակոռուպցիոն դատարան՝ Երևանի Տիգրան Մեծի պողոտա 16 հասցեում գտնվող անշարժ գույքի վերաբերյալ։ Գույքի նախկին հասցեն Մովսես Խորենացու փողոց 43-ն է, որտեղ գտնվել է «Այրարատ», նույն իքը «Ռոսիա» կինոթատրոնը։
Դատական գործով հայցվորն ՀՀ գլխավոր դատախազությունն է, պատասխանողներն են Պետական գույքի կառավարման կոմիտեն, «Նարեկ» ՍՊԸ-ն և «Ամերիաբանկ» ՓԲԸ-ն։ Դատախազությունը պահանջում է բռնագանձում տարածել «Նարեկ» ՍՊԸ-ին սեփականության իրավունքով պատկանող գույքի վրա, ինչպես նաև տվյալ անշարժ գույքի մասով մասնակի անվավեր ճանաչել գրավի պայմանագիրը և կիրառել անվավերության հետևանքներ։
Գլխավոր դատախազության հաղորդմամբ՝ հայցի հիմքում դրվել է այն հանգամանքը, որ մինչև 2017 թվականի հունվարի 14-ը չեն կատարվել գույքի մասնավորեցման գործարքով նախատեսված՝ 1 մլն 550 հազար ԱՄՆ դոլարին համարժեք դրամի ներդրումները։
Հակակոռուպցիոն դատարանը՝ դատավոր Աշխեն Ղարսլյանի նախագահությամբ, 2026 թվականի հոկտեմբերի 5-ին հայցադիմումն ընդունել է վարույթ։ Դատարանի որոշման համաձայն՝ հայցը վերաբերում է գույքի վրա բռնագանձում տարածելուն, գրավի պայմանագրերը մասնակի անվավեր ճանաչելուն և անվավերության հետևանքներ կիրառելուն։
Նույն օրը դատարանը բավարարել է նաև Գլխավոր դատախազության՝ հայցի ապահովման միջոց կիրառելու միջնորդությունը։ «Նարեկ» ՍՊԸ-ին արգելվել է գույքի նկատմամբ կատարել այնպիսի գործողություններ, որոնք կարող են հանգեցնել դրա սեփականատիրոջ փոփոխության կամ վատթարացնել անշարժ գույքի իրավական կամ փաստացի վիճակը։
