Golden Globes-ը հրապարակել է հոկտեմբերի 23–24-ը Ուզբեկստանի մայրաքաղաք Տաշքենդում կայանալիք առաջին Golden Globes Silk Road Tribute Gala-ի շրջանակում մեծարվող վեց կինոյի և հեռուստատեսության գործիչների անունները։ Նրանց թվում է հայ դերասան Սամվել Թադևոսյանը, որը կարժանանա Golden Globes Beacon Award հատուկ մրցանակին։
Golden Globes-ի հաղորդմամբ՝ այս տարի ընտրված վեց գործիչները ներկայացնում են Հայաստանը, Վրաստանը, Ադրբեջանը, Ղազախստանը և Ուզբեկստանը։ Նրանք մեծարվելու են երեք հատուկ տարբերակումների՝ Golden Globes Meridian Award, Golden Globes Trailblazer Award և Golden Globes Beacon Award շրջանակում։
Beacon Award-ը նախատեսված է տարածաշրջանի նոր սերնդի դերասանների համար, որոնց աշխատանքը, ըստ Golden Globes-ի, ներկայացնում է կինոյի և հեռուստատեսության նոր տաղանդներին։ Այս տարբերակմանը կարժանանան Հայաստանից Սամվել Թադևոսյանը և Ղազախստանից դերասանուհի Շուղիլա Էսենը։
Golden Globes-ը Սամվել Թադևոսյանին ներկայացնում է որպես կինոյի, հեռուստատեսության և թատրոնի հայ դերասան։ Հաղորդագրությունում առանձնացվում է նրա գլխավոր դերակատարումը Մհեր Մկրտչյանի «Կյանք ու կռիվ» ռազմական դրամայում, որի համար դերասանն արժանացել է Հայաստանի Հանրապետության պետական մրցանակի և Հայաստանի ազգային կինոակադեմիայի «Անահիտ» մրցանակին։ Նշվում է նաև նրա թատերական գործունեությունը, այդ թվում՝ «Էգոիստ» մոնոներկայացումը։
Golden Globes Meridian Award-ին կարժանանան Ուզբեկստանի կինոյի երկու ներկայացուցիչներ՝ դերասանուհի Գուլչեխրա Ջամիլովան և ռեժիսոր, սցենարիստ ու պրոդյուսեր Ալի Խամրաևը։ Այս մրցանակը նախատեսված է կինոյի, հեռուստատեսության և արվեստի ոլորտներում երկարամյա գործունեությամբ նշանակալի ազդեցություն ունեցած գործիչների համար։ Խամրաևի ավելի քան վեց տասնամյակ տևող կարիերան ներառում է ավելի քան 20 խաղարկային և 30 վավերագրական ֆիլմ։
Golden Globes Trailblazer Award-ը կստանան ադրբեջանցի ռեժիսոր, սցենարիստ և դերասանուհի Թահմինա Ռաֆայելլան և վրացի ռեժիսոր, սցենարիստ ու պրոդյուսեր Լևան Կոգուաշվիլին։ Ռաֆայելլայի «Banu» լիամետրաժ ռեժիսորական դեբյուտը ստեղծվել է Biennale College Cinema ծրագրի շրջանակում և ներկայացվել Վենետիկի 79-րդ միջազգային կինոփառատոնում։ Կոգուաշվիլին հայտնի է «Brighton 4th», «Street Days», «Blind Dates» և այլ ֆիլմերով, իսկ նրա նոր՝ «Guria» ֆիլմը ներկայացվել է 2026 թվականի Վենետիկի կինոփառատոնում և Վրաստանի կողմից առաջադրվել է «Օսկար»-ի։
Golden Globes-ի նախագահ Հելեն Հոնը նշել է, որ ընտրված վեց արվեստագետների աշխատանքները ներկայացնում են Կենտրոնական Ասիայի և Կովկասի ստեղծագործական բազմազանությունն ու պատմողական ավանդույթները՝ տարածաշրջանի պատմությունները հասցնելով ինչպես տեղական, այնպես էլ միջազգային լսարաններին։
Golden Globes Silk Road Tribute Gala-ն անցկացվելու է առաջին անգամ և նվիրված է Կենտրոնական Ասիայի ու Կովկասի կինոյի և հեռուստատեսության ներկայացուցիչներին։ Երկօրյա միջոցառումը կկայանա հոկտեմբերի 23–24-ը Տաշքենդում։ Այն կազմակերպում և ներկայացնում է Vivid Strategies-ը՝ Golden Globes-ի հետ համագործակցությամբ։ Միջոցառման ծրագրի լրացուցիչ մանրամասները դեռ կհրապարակվեն։
