Խմբագրական նշում
Նյութը խմբագրվել է 2025 թվականի հունիսի 6-ին՝ հաշվի առնելով հանձնախմբի կազմի փոփոխության վերաբերյալ Հայաստանի կինոյի հիմնադրամի նոր հրապարակումը։ Նախապես հոդվածում նշված էր Արամ Շահբազյանի անունը որպես հանձնախմբի անդամ։ Ըստ նոր տվյալների՝ նրան փոխարինել է Նիկոլայ Դավթյանը՝ «Ազգային ֆիլմերի նախագծերի պետական ֆինանսավորման տրամադրման մրցույթների կազմակերպման և անցկացման» կանոնակարգի 50-րդ կետի 3-րդ ենթակետի հիման վրա (շահերի բախում)։
Մայիսի 23-ին Հայաստանի կինոյի հիմնադրամը հրապարակել է 2025 թվականի առաջին պետական ֆինանսավորման մրցույթի շրջանակներում հայտադիմումները գնահատող մասնագիտական հանձնախմբերի կազմերը։ Լիամետրաժ և կարճամետրաժ նախագծերի համար ձևավորված են առանձին հանձնախմբեր, որոնց կազմում ընդգրկված են կինոյի ոլորտի ներկայացուցիչներ ինչպես Հայաստանից, այնպես էլ արտասահմանից։
Լիամետրաժ նախագծերի հանձնախումբ
- Աշոտ Մկրտչյան – ճանաչված կինոօպերատոր։ Աշխատել է մի շարք հայկական ֆիլմերի վրա, մասնագիտական փորձ ունի գեղարվեստական ֆիլմարտադրության ոլորտում։
- Թամարա Ստեփանյան – ռեժիսոր և պրոդյուսեր, ապրում է Ֆրանսիայում։ Նրա ֆիլմերը մասնակցել են միջազգային փառատոների, ընդգրկված է հայկական անկախ կինոյի միջազգային շրջանակում։ Հանդիսացել է 2024 թվականի առաջին մրցույթի Լիամետրաժ նախագծերի գնահատող հանձնախմբի անդամ:
- Մկրտիչ Խաչատրյան – կինոօպերատոր, աշխատում է հիմնականում սիթքոմներում և գեղարվեստական ֆիլմերում։
- Նորա Անանյան – ռեժիսոր և պրոդյուսեր՝ Հայաստանի և Բելգիայի համագործակցության փորձով։ Նրա աշխատանքները միտված են համատեղ արտադրություններին։ Հանդիսացել է 2024 թվականի առաջին մրցույթի Կարճամետրաժ նախագծերի գնահատող հանձնախմբի անդամ:
- Քնարիկ Միրզոյան – սցենարիստ, մասնակցել է մի շարք սցենարների մշակմանը։
Կարճամետրաժ նախագծերի հանձնախումբ
- Նիկոլայ Դավթյան – հեռուստատեսային մի շարք փաստավավերագրական ֆիլմերի կինոռեժիսոր։
- Լևոն Մինասյան – ռեժիսոր և սցենարիստ, ապրում և ստեղծագործում է Ֆրանսիայում։ Նրա ֆիլմերը կապում են հայկական և ֆրանսիական մշակութային հարթակները։ Հանդիսացել է 2024 թվականի առաջին մրցույթի Կարճամետրաժ նախագծերի գնահատող հանձնախմբի անդամ:
- Հրաչյա Քեշիշյան – կինոռեժիսոր և պրոդյուսեր, երկարամյա փորձ ունի հեռուստատեսությունում և կինոարտադրությունում։
- Կարինե Սիմոնյան – պրոդյուսեր, աշխատել է մի շարք ֆիլմերի և նախագծերի վրա։
- Մկրտիչ Մալխասյան – կինոօպերատոր, աշխատում է ԱՄՆ-ում, ունի միջազգային նախագծերի փորձ։ Հանդիսանում է Հայաստանի օպերատորների գիլդիայի նախագահ:
Այս հանձնախմբերը հիմնականում բաղկացած են կինոարտադրության ոլորտի մասնագետներից՝ ռեժիսորներ, օպերատորներ, սցենարիստ և պրոդյուսերներ։ Ներկայացված է նաև սփյուռքի փորձագիտական ներուժը։
Ներկայացված հանձնախմբերը համալրված են բացառապես կինոյի ոլորտի մասնագետներով՝ առանց ակադեմիական, քննադատական, պետական կամ մասնավոր բիզնես ոլորտների ներկայացուցիչների։ Սա կարող է խոսել մասնագիտական մոտեցման շեշտադրման մասին, սակայն նաև վկայում է ոլորտային միատարրության մասին։ Սա առաջ է բերում որոշ հարցեր՝ հանձնախմբերի հնարավոր միակողմանիության և համակարգային անաչառության տեսանկյունից։ Գենդերային տարբերակվածությունը պահպանվում է՝ երկու հանձնախմբերում էլ կան ինչպես կին, այնպես էլ տղամարդ մասնագետներ։
