ԱԺ պատգամավորներ Մխիթար Հայրապետյանի, Աննա Կոստանյանի, Արթուր Մանուկյանի և Արման Եղոյանի հեղինակած «Կինեմատոգրաֆիայի մասին» օրենքի նախագիծը և Վարչական իրավախախտումների ու Հարկային օրենսգրքերում փոփոխություններ ու լրացումներ նախատեսող օրենսդրական փաթեթը մայիսի 7-ի նիստում քննարկվեց առաջին ընթերցմամբ։
Ըստ Աննա Կոստանյանի՝ նշված օրենքների նախագծերի ընդունումը նոր խթան կհանդիսանա կինեմատոգրաֆիայի զարգացման համար։ Նպատակն է հստակեցնել կինեմատոգրաֆիայի ոլորտի պետական քաղաքականության սկզբունքները, պետական կառավարման մարմնի և ազգային մարմնի լիազորությունները, սահմանել ֆիլմարտադրության, ֆիլմի ցուցադրման, վարձույթի, պահպանության և վիճակագրական հաշվառման հիմնական կանոնները, ազգային ֆիլմերի ստեղծման ու առաջխաղացման նպատակով հատկացումների կատարման և բարենպաստ պայմանների ստեղծման հիմնական կանոնները:
Առաջարկվող կարգավորումներով հեռարձակողների կողմից ազգային ֆիլմերի ցուցադրման ընթացքում տեղադրվող գովազդի վաճառքից և կինոթատրոնում ազգային ֆիլմի ցուցադրման տոմսերի վաճառքից ստացված եկամուտների մասով շահութահարկից ազատելու արտոնություն է տրվում։ Աննա Կոստանյանի գնահատմամբ՝ դա պետական բյուջեի վրա բացասական ազդեցություն չի ունենալու։ 18% չվճարված շահութահարկի 10% դրամագլխի միջոցով հատկացվելու է ազգային ֆիլմերի ստեղծմանը, 8% մնալու է հեռարձակողի կամ կինոթատրոնի տնօրինության տակ։ Այդ գումարի չափով ֆիլմարտադրողների ստեղծած հավելյալ արժեքը կրկին հարկվելու է։ Արտաբյուջետային հաշիվ չի բացվելու և պետական միջոցներն այստեղ չեն մուտքագրվելու։
Պատգամավոր Արթուր Մանուկյանը, ներկայացնելով ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի դրական եզրակացությունը, անդրադարձավ ամբողջ աշխարհում կինոյի հանրային նշանակության կարևորությանը, կինեմատոգրաֆիայի ոլորտում պետական աջակցությանը։
ԿԳՄՍ նախարարի տեղակալ Արայիկ Խզմալյանի գնահատմամբ՝ կինոյի ոլորտը կարիք ունի բարեփոխումների, իսկ այս նախագիծն ունի այդ բարեփոխումների իրականացմանն ուղղված ուղերձ։ Նա նշեց, որ օրինագծի որոշ դրույթներ դեռևս կքննարկվեն։
ԱԺ փոխնախագահ Ալեն Սիմոնյանը, պատգամավորներ Արտակ Մանուկյանը, Արթուր Մանուկյանը, Արման Եղոյանը, Լիլիթ Մակունցը, Արման Բաբաջանյանը, Շիրակ Թորոսյանը և Մխիթար Հայրապետյանն իրենց ելույթներում անդրադարձան կինոյի զարգացման հարցում իրականացվելիք քայլերին, տրամադրվող սուբսիդիաներին, նախագծի ունեցած օրենսդրական խնդրահարույց կետերին, մասնավորապես` հարկային արտոնության տրամադրման նպատակահարմարությանը։ Պատգամավորները հիմնականում կողմ արտահայտվեցին նախաձեռնության ընդունմանը։
Օրվա ավարտին խորհրդարանը քվեարկությամբ ընդունեց քննարկված նախաձեռնությունները։ Սպառելով օրակարգը՝ Ազգային ժողովն ավարտեց հերթական նիստերի աշխատանքը:
