Սեպտեմբերի 4-ին մեկնարկում է ՄԷԿ ԿԱԴՐ կարճ ֆիլմերի միջազգային կինոփառատոնը, որը աջակցում է Հայաստանում անկախ, հեղինակային կինոարտադրության զարգացմանը: Փառատոնում նկարահանման տեխնիկայի, կրիչի սահմանափակումներ չկան: Ֆիլմերը կարող են նկարահանվել հնարավոր բոլոր միջոցներով՝ բջջային հեռախոսից մինչև ժամանակակից թվային տեխնիկա, կինոժապավեն:
Փառատոնի մրցույթային անվանակարգ են՝
- ՄԷԿ ԿԱԴՐ ՄԷԿ ՐՈՊԵ ֆիլմեր (60 րոպե, առանց մոնտաժի)
- Կարճ ֆիլմեր (մինչև 30 րոպե տևողությամբ)
- Կինո առանց սահմանի (չկա որևէ սահմանափակում):
Փառատոնն ունի ԶՐՈ ԲՅՈՒՋԵ ֆիլմարտադրության աջակցման հարթակը, որտեղ կարող են հայտագրվել մինչև 15 րոպե տևողություն ունեցող ֆիլմերի նախագծեր:
ՄԷԿ ԿԱԴՐ կարճ ֆիլմերի միջազգային փառատոնը բաց կինոհարթակ է: Հիմնադրվել է 2003 թվականին: Խորհրդանիշը Հայաստանի Գեղամա լեռներում գտնված 5000ամյա ժայռապատկերից վերակերտված բրոնզաձույլ արձանիկն է:
Հայաստանում հաստատված արտակարգ դրության ռեժիմի ու հանրային կյանքի, գործունեությունների սահմանափակումների բերումով, որի նպատակն է խոչընդոտել նոր կորոնավիրուսային հիվանդության (COVID-19) տարածումը, 2020 թվականին ՄԷԿ ԿԱԴՐ կինոփառատոնը տեղի կունենա առցանց հեռարձակմամբ՝ ՄԷԿ ԿԱԴՐ ԿՖՄՓ կայքի` www.oneshot.am և Ֆեյսբուքյան էջի միջոցով:
Բացումը տեղի կունենա սեպտեմբերի 04, ժամը` 18:45:
