Դուեյն Ջոնսոնը DC FanDome առցանց կոնֆերանսի նախաշեմին Instagram-ում կիսվել է «Սև Ադամ» ֆիլմի թիզերով: Հոլովակում դերասանը ներկայանում է DC տիեզերքի հակահերոսի կերպարում:
Իսկ մի քանի ժամ անց հայտնվել է նաև սուպերհերոսական ֆիլմի պաշտոնական թիզերը՝ կարճ սինոփսիսի շարադրանքով:
Շազամի գլխավոր թշնամու մասին DC կոմիքսի էկրանավորման ռեժիսորն է Ժաումե Կոլետ-Սերուն: Ֆիլմի համաշխարհային պրեմիերան նշանակված է 2021 թվականի դեկտեմբերի 22-ին:
Կոմիքսներում Սև Ադամը կիսաանմահ եգիպտացի իշխան էր, որը, ստանալով հրաշագործի ուժը, մտադիր էր գրավել ամբողջ աշխարհը: Ի սկզբանե պլանավորվում էր Սև Ադամին ներկայացնել Շազամի մասին առաջին ֆիլմում, սակայն պլանները փոխվել են, և ստուդիան որոշել է առանձին ժապավեն նկարահանել հզոր կերպարի մասին:
Հիշեցնենք, որ օգոստոսի 22-ի լույս 23-ի գիշերը DC FanDome-ի առցանց շնորհանդեսն էր: Ներկայացվել է ֆան-արտեր, քոմիքսներ, խաղեր և թրեյլերներ, ինչպես նաև թարմ տեղեկատվություն գալիք ֆիլմերի մասին: Նրանց թվում են՝ «Հրաշք Կին 1984», «Ինքնասպանների ջոկատ 2», «Բեթմեն» և այլն:
