Անսիի անիմացիոն ֆիլմերի միջազգային փառատոնը, որը կանցկացվի հունիսի 21–27-ը, հրապարակել է այս տարվա Annecy Classics ծրագրի կազմը։ Ծրագիրը ներառում է ռետրոսպեկտիվ ցուցադրություններ, հեղինակային ժառանգության վերարժևորումներ, վերականգնված ֆիլմեր և անիմացիայի պատմության տարբեր էջեր ներկայացնող ընտրանիներ։
Այս տարվա ծրագրում առանձին տեղ է հատկացվել հայկական անիմացիային։ ՀՀ ԿԳՄՍ նախարարության աջակցությամբ Annecy Classics-ում կցուցադրվի հայկական անիմացիոն 9 ֆիլմ՝ հիմնականում հիմնված Հովհաննես Թումանյանի ստեղծագործությունների վրա։ Ծրագիրը համատեղ իրականացվում է Հայաստանի կինոյի հիմնադրամի և «ՌեԱ» փառատոնի կողմից։
Հայկական ընտրանիում ընդգրկված են Լյուդմիլա Սահակյանցի «Արձագանք» և «Մկների ժողովը», Գայանե Մարտիրոսյանի «Երջանիկ ավարտ», Ստեփան Գալստյանի «Ձախորդ Փանոս» և «Միջանցք», Վալենտին Պոդպոմոգովի «Փարվանա», Ռոբերտ Սահակյանցի «Կացինը» և «Սեղմակոճակ», ինչպես նաև Էլլա Ավագյանի «Հսկան, որը երազում էր ջութակ նվագել» ֆիլմերը։
Այս ֆիլմերը կարևոր տեղ ունեն հայկական անիմացիայի պատմության մեջ։ Դրանք ներկայացնում են այն շրջանը, երբ հայկական անիմացիան ձևավորում էր իր ճանաչելի լեզուն՝ համադրելով գրական հիմքը, հումորը, պայմանական պատկերը և հեղինակային գեղարվեստական մտածողությունը։ Անսիի Classics ծրագրում ընդգրկումը հնարավորություն է այդ ժառանգությունը ներկայացնելու ոչ միայն որպես ազգային հիշողության մաս, այլև որպես միջազգային անիմացիոն պատմության հետ երկխոսող կինոմշակույթ։
Ֆիլմերի ցուցադրությունը նաև կապված է հայկական կինոժառանգության վերականգնման պետական քաղաքականության հետ։ Հայաստանում իրականացվում են ֆիլմերի թվայնացման և վերականգնման ամենամյա ծրագրեր։ Մասնավորապես, Հայ կինոյի 100-ամյակի և հայկական անիմացիայի 85-ամյակի շրջանակում նախատեսվել էր թվայնացնել և վերականգնել 32 ֆիլմ, այդ թվում՝ 17 անիմացիոն կարճամետրաժ։ Այդ գործընթացը շարունակվել է նաև հաջորդ տարիներին՝ ընդգրկելով հայկական կինոժառանգության տարբեր շերտեր։
Հայաստանը այս տարի, ինչպես նախկինում, Անսիի MIFA կինոշուկայում կներկայացվի նաև Հայաստանի կինոյի հիմնադրամի տաղավարով։ Այն նախատեսված է որպես աշխատանքային հարթակ, որտեղ հայ կինոգործիչները կարող են անցկացնել հանդիպումներ, ներկայացնել նախագծեր և կապեր հաստատել միջազգային գործընկերների հետ։ MIFA-ն Անսիի փառատոնի մասնագիտական շուկան է և համարվում է անիմացիոն նախագծերի զարգացման, համարտադրության և միջազգային առաջխաղացման կարևոր հարթակներից մեկը։
Annecy Classics-ի այս տարվա մյուս առանցքներից են Սթիվեն և Թիմոթի Քուեյ եղբայրների ստեղծագործական ժառանգությունը, ճապոնական անիմացիայի 1990-ականների կարևոր ֆիլմերը, ինչպես նաև 2024 թվականին կյանքից հեռացած բրիտանացի անիմատոր Էմմա Քալդերի աշխատանքների ռետրոսպեկտիվը։ Ծրագրում կցուցադրվեն նաև Իսաո Տակահատայի Grave of the Fireflies, Սատոսի Կոնի Perfect Blue, Յոշիակի Կավաջիրիի Ninja Scroll և Մամորու Օշիի Ghost in the Shell ֆիլմերը։
Փառատոնի շրջանակում կանցկացվի նաև MIFA Pitches ծրագիրը։ Այս տարի ընտրվել է 48 նախագիծ, իսկ Partners Pitches ձևաչափում կներկայացվի մոտ 130 նախագիծ տարբեր երկրներից։ Կազմակերպիչների տվյալներով՝ 2026 թվականի MIFA Pitches-ի համար ստացվել է 882 հայտ՝ 95 ազգության ներկայացուցիչներից։
