ԵՐԵՎԱՆ, ՀՈՒՆԻՍԻ 19, ԿԻՆՈՊՐԵՍ։ «ԿինոՊրես»-ի հիմնադիր և գլխավոր խմբագիր Սերգեյ Հովսեփյանն ընդգրկվել է 84-րդ Ոսկե գլոբուս / Golden Globes մրցանակաբաշխության քվեարկողների կազմում։
Սերգեյ Հովսեփյանը, մեկնաբանելով իր ընդգրկումը քվեարկողների կազմում, նշել է․
«Այս հնարավորությունը դիտարկում եմ ոչ միայն որպես անձնական ձեռքբերում, այլև որպես «ԿինոՊրես»-ի տարիների աշխատանքի ճանաչում։ Մեր նպատակն ի սկզբանե եղել է ստեղծել անկախ հարթակ՝ նվիրված հայկական և համաշխարհային կինոյին։ Շնորհակալ եմ մեր ընթերցողներին, գործընկերներին, կինոգործիչներին և բոլոր նրանց, ովքեր եղել են այս ճանապարհի մի մասը»։
Ոսկե գլոբուսի քվեարկողները ժամանցային ոլորտի և կինոյի լրագրողներ են աշխարհի տարբեր երկրներից, որոնք մասնակցում են կինոյի, հեռուստատեսության և փոդքասթների անվանակարգերում առաջադրվածների և հաղթողների ընտրությանը։
«ԿինոՊրես»-ի համար սա կարևոր ճանաչում է Հայաստանից իրականացվող անկախ կինոլրագրության համար և ևս մեկ քայլ՝ հայկական կինոյի տեղեկատվական դաշտը միջազգային մասնագիտական համայնքի հետ ավելի սերտ կապելու ուղղությամբ։
Սերգեյ Հովսեփյանը «ԿինոՊրես»-ի հիմնադիրն ու գլխավոր խմբագիրն է։ Նրա լրագրողական գործունեությունը կենտրոնացած է հայկական կինոյի, կինոքաղաքականության, կինոփառատոների, ոլորտային ինստիտուտների և միջազգային կինոարդյունաբերության լուսաբանման վրա։
«ԿինոՊրես»-ը շարունակելու է լուսաբանել հայկական և միջազգային կինոն, կինոփառատոները, ոլորտային գործընթացներն ու միջազգային նախաձեռնությունները։
