Անսիի միջազգային անիմացիոն կինոփառատոնի Annecy Classics ծրագրում հայկական անիմացիոն ֆիլմերի ցուցադրության շուրջ առաջացած իրավիճակից հետո «ԿինոՊրես»-ը հարցում էր ուղարկել Kissani Films-ին՝ պարզելու ընկերության դիրքորոշումը։
«ԿինոՊրես»-ին պատասխանել է Kissani Films-ի ներկայացուցիչ Անի Համելը։ Նրա խոսքով՝ ավելի քան մեկ տարի Kissani Films-ը Ֆրանսիական սինեմատեքի հետ աշխատում է հայկական 9 անիմացիոն ֆիլմերի վերականգնման նախագծի վրա։
Ըստ նամակի՝ նախագիծը վերաբերում է առանց դիալոգների հայկական անիմացիոն ֆիլմերի, որոնք ստեղծվել են Խորհրդային Միության փլուզումից առաջ և հետո։ Անի Համելը նշում է, որ նախագիծը ներկայացվել է Հայաստանի կինոյի հիմնադրամի տնօրեն Դավիթ Բանուչյանին, իրավաբանական ծառայության ղեկավար Արմեն Սարգսյանին, ինչպես նաև միջազգային կապերի պատասխանատուներ Լիլիթ Առաքելյանին և Սուսաննա Հարությունյանին։
Kissani Films-ի փոխանցմամբ՝ նախագիծը հայկական կողմի կողմից ընդունվել է ոգևորությամբ։ Նամակում նշվում է, որ Ֆրանսիական սինեմատեքը վերականգնման աշխատանքների իրականացման համար զգալի գումար է հատկացրել։
Ըստ Անի Համելի՝ Հայաստանի կինոյի հիմնադրամը մի քանի ամիս առաջ ստացել է Ֆրանսիական սինեմատեքի կազմած եռակողմ համաձայնագիրը՝ Ֆրանսիական սինեմատեքի, Հայաստանի կինոյի հիմնադրամի և Kissani Films-ի միջև։ Ընկերության պնդմամբ՝ հիմնադրամը մինչ օրս որևէ ընթացք չի տվել փաստաթղթին։
«Հայաստանի կինոյի հիմնադրամը որևէ պատասխան չի տվել», — նշում է Անի Համելը՝ հավելելով, որ Ֆրանսիական սինեմատեքի մի քանի հիշեցումներին նույնպես պատասխան չի ստացվել։
Համելի խոսքով, Ֆրանսիական սինեմատեքը հետագայում տեղեկացել է, որ Հայաստանի կինոյի հիմնադրամը Անսիի փառատոնում ներկայացնում է հայկական 9 անիմացիոն ֆիլմ, որոնցից 3-ը ընդգրկված են նույն վերականգնման նախագծում։
Kissani Films-ի փոխանցմամբ՝ դրանից հետո ընկերությունը դիմել է Անսիի փառատոնի ծրագրավորման տնօրենին՝ խնդրելով հանել այդ երեք ֆիլմերը և նշել, որ մնացած վեցը կարող են ցուցադրվել անվճար։
«Մենք ոչինչ չենք պահանջում այդ ֆիլմերի համար։ Մենք աչք ենք փակում մեր իրավունքների չհարգման և մեր («Հայֆիլմ» կ/ս հետ — խմբ.) պայմանագրի խախտման վրա», — նշված է «ԿինոՊրես»-ին ուղարկված պատասխանում։
Անի Համելը նաև հայտնում է, որ Հայաստանի կինոյի հիմնադրամը կամ որևէ հայկական հաստատություն Kissani Films-ին չի դիմել Annecy Classics ծրագրում ներկայացված ֆիլմերի անվանումների վերաբերյալ։
Ընկերությունը շեշտում է, որ այս վեճը, իր մեկնաբանությամբ, չի վերաբերում 265 ֆիլմերի նկատմամբ իրավունքների պահանջին։ Ըստ Kissani Films-ի՝ խոսքը Անսիում ներկայացված 3 ֆիլմերի մասին է, որոնք ընդգրկված են Ֆրանսիական սինեմատեքի հետ համատեղ 9 հայկական անիմացիոն ֆիլմերի վերականգնման նախագծում։
