Հայաստանի ազգային կինոակադեմիան հայտարարել է, որ 99-րդ «Օսկար» մրցանակաբաշխության «Լավագույն միջազգային լիամետրաժ ֆիլմ» անվանակարգում Հայաստանը կներկայացնի ռեժիսոր Թամարա Ստեփանյանի «Արտոյի երկիրը» լիամետրաժ ֆիլմը։
Կինոակադեմիայի հրապարակած հաղորդագրությունը, սակայն, պարունակում է միայն ընտրված ֆիլմի անունը։ Դրանում չի նշվում, թե քանի ֆիլմ էր ներկայացվել Հայաստանի հայտը որոշելու համար ավելի վաղ հայտարարված մրցույթին, որոնք էին մյուս հավակնորդները, ովքեր էին ընտրություն կատարող հանձնաժողովի անդամները և ինչ ընթացակարգով էր կայացվել վերջնական որոշումը։
2026 թվականի հունիսի 4-ին Հայաստանի ազգային կինոակադեմիան հայտարարել էր 99-րդ «Օսկար» մրցանակաբաշխության «Լավագույն միջազգային լիամետրաժ ֆիլմ» անվանակարգում Հայաստանի կողմից ներկայացվելու համար ֆիլմերի ընդունելության մասին։
Հայտերն ընդունվում էին մինչև օգոստոսի 14-ը ներառյալ։ Դիմելու համար կինոարտադրողներին առաջարկվում էր լրացնել պաշտոնական հայտադիմումը, այն ուղարկել Կինոակադեմիայի էլեկտրոնային հասցեին և ծանոթանալ Ամերիկյան կինոակադեմիայի՝ «Լավագույն միջազգային լիամետրաժ ֆիլմ» անվանակարգի որակավորման չափանիշներին։
Դիմումների ընդունման ավարտից հետո Կինոակադեմիան հրապարակայնորեն չի ներկայացրել ստացված հայտերի կամ մրցույթի մասնակից ֆիլմերի ցանկը։ Սեպտեմբերի 4-ին հրապարակվել է արդեն վերջնական արդյունքը՝ Հայաստանի ներկայացուցիչ է ընտրվել «Արտոյի երկիրը»։
Այս պայմաններում բաց է մնում հարցը, թե քանի հայտ է ստացել Կինոակադեմիան, որ ֆիլմերն են հավակնել Հայաստանը ներկայացնելուն և ինչպիսի ընտրության արդյունքում է որոշվել հաղթողը։
Սա երկրորդ տարին անընդմեջ է, երբ Հայաստանը «Լավագույն միջազգային լիամետրաժ ֆիլմ» անվանակարգում ներկայացնում է Թամարա Ստեփանյանի ֆիլմը։
98-րդ «Օսկար» մրցանակաբաշխության համար Հայաստանի ազգային կինոակադեմիան ընտրել էր ռեժիսորի «Իմ հայկական ուրվականները» («My Armenian Phantoms») ֆիլմը։ Այս տարի ընտրվել է նրա «Արտոյի երկիրը» («Land of Arto»)։
«ԿինոՊրես»-ն ավելի վաղ դիմել էր Հայաստանի ազգային կինոակադեմիային՝ խնդրելով պարզաբանել ակադեմիայի քվեարկության և որոշումների ընդունման ընթացակարգերը։
Խմբագրությունը, մասնավորապես, խնդրել էր տրամադրել ակադեմիայի կանոնադրությունը, անդամակցության կարգը, անդամների ցանկը և գործող այլ կարգավորող փաստաթղթեր, ինչպես նաև պարզաբանել քվեարկության վերահսկողության, շահերի բախման և անդամների մասնակցության մեխանիզմները։
Հարցումն ուղարկելուց հետո Կինոակադեմիայից պատասխան կամ պահանջված փաստաթղթերը չեն ստացվել։
«Օսկար»-ի համար Հայաստանի հայտի ընտրության հրապարակումից հետո այդ տեղեկատվությունը լրացուցիչ նշանակություն է ստանում, քանի որ տվյալ դեպքում Կինոակադեմիայի իրականացրած ընտրության արդյունքը ներկայացվում է միջազգային մրցանակաբաշխության շրջանակում որպես Հայաստանի ազգային հայտ։
