Փետրվարի 16-ին Հայաստանի կինոյի հիմնադրամը հանդես է եկել հրապարակումով, որտեղ նշվում է, որ Հայաստանը հաստատում է ներդրումների մասնակի վերադարձի (Cash Rebate) ծրագիրը ֆիլմարտադրության համար:
Նոր օրենսդրական փոփոխությունների արդյունքում հաստատվել էր նոր ծրագիր, որը թույլ կտա ֆիլմարտադրողներին ստանալ 10-40% ներդրումների մասնակի վերադարձ: Այս նախաձեռնությունը նպատակ ունի խթանել ինչպես տեղական, այնպես էլ միջազգային ֆիլմարտադրությունը՝ ապահովելով ֆինանսական աջակցություն Հայաստանում իրականացվող կինոնախագծերի համար:
Ներդրումների մասնակի վերադարձից կարող են օգտվել այն ֆիլմարտադրողները, որոնք իրականացնում են նկարահանումներ Հայաստանում՝ պայմանով, որ ծախսերը կատարված են երկրի ռեզիդենտներից ձեռք բերված ապրանքների և ծառայությունների համար: Ծրագիրը ներառում է տեխնիկական սարքավորումների վարձույթ, դեկորացիաների ստեղծում, տրանսպորտային ծառայություններ, հյուրանոցային ծախսեր և այլ կինոարտադրական գործառույթներ:
Ֆիլմարտադրողները պետք է դիմեն Հայաստանի կինոյի հիմնադրամ՝ ներկայացնելով հայտ: Հայտը կուսումնասիրվի, որից հետո վերջնական որոշումը կկայացնի ՀՀ ԿԳՄՍ նախարարությունը:
Ծանոթագրություն
«Ներդրումների մասնակի վերադարձը տրամադրելու, մերժելու և դադարեցնելու կարգն ու պայմանները, ներդրումների մասնակի վերադարձի ենթակա ծախսերում հաշվարկվող՝ ֆիլմարտադրության հետ անմիջականորեն կապված ապրանքների, ծառայությունների և աշխատանքների ցանկը և վերադարձի ենթակա դրամական ծախսերի չափը սահմանելու պայմաններն ու հաշվարկելու նորմատիվները հաստատելու մասին» ՀՀ կառավարության որոշումը դեռևս ընդունված չէ: Այսինքն դեռևս հայտնի չէ ներդրումների մասնակի վերադարձի տրամադրման հստակ կարգը, փաստաթղթերի ձևանմուշները և այլն:
Հայաստանի կինոյի հիմնադրամ ներկայացվող հայտի ձևը առայժմ նույնպես հայտնի չէ: Հիմնադրամը նշում է, որ «պատրաստ է շահագրգիռ անձանց տրամադրել լրացուցիչ տեղեկություններ»:
Հայաստանի Հանրապետության 2025 թվականի հաստատված պետական բյուջեյով Կինեմատոգրաֆիայի ծրագրի բյուջեն կազմել է 842,222.900 դրամ (2024 թվականի բյուջեն կազմում էր 849,723.300 դրամ), որից «Կինոարտադրության ներդրումների վերադարձ» միջոցառման համար հատկացվել է 124,335.000 դրամ: Հատկացումը կատարվել է մեծամասամբ «Կինոծրագրերի իրականացում» միջոցառումից, որը, ի տարբերություն 2024 թ. բյուջեյով սահմանված 204 մլն. դրամի նվազեցվել է մինչև 102 մլն. դրամ:
Հունվարին ԿինոՊրես-ը անդրադարձել էր Հայաստանի կինոյի հիմնադրամի Եվրոկապան կինոշուկայում սպասվող ներկայությանը և ենթադրել, որ կարգավորող նորմատիվ ակտը կընդունվի կինոշուկայի բացման օրը:
