ՀՀ կրթության, գիտության, մշակույթի և սպորտի նախարարության 2024 թվականի բյուջեն նախատեսված է 345 մլրդ 417 մլն դրամ, որը նախորդ տարվա ծախսերի համեմատ աճել է 95 մլրդ 148 մլն դրամով կամ 38%-ով։ ԱԺ գիտության, կրթության, մշակույթի, սփյուռքի, երիտասարդության և սպորտի հարցերի ու Ֆինանսավարկային և բյուջետային հարցերի մշտական հանձնաժողովների համատեղ նիստում «ՀՀ 2024 թվականի պետական բյուջեի մասին» ՀՀ օրենքի նախագծի նախնական քննարկումների ժամանակ այս մասին հայտնել է ՀՀ ֆինանսների նախարարի տեղակալ Վահան Սիրունյանը։
Կրթության ոլորտի ծախսերը կկազմեն 285 մլրդ դրամ, որը նախորդ տարվա համեմատ աճել է շուրջ 47%-ով, իսկ գիտության ոլորտի ծախսերը կկազմեն շուրջ 32 մլրդ 498 մլն դրամ, որը նախորդ տարվա համեմատ աճել է 8%-ով։ Մշակույթի ոլորտի ծախսերը կկազմեն 18 մլրդ 909 մլն դրամ, սպորտի ոլորտինը՝ 6 մլրդ 656 մլն դրամ, իսկ երիտասարդության ոլորտինը՝ 2 մլրդ 331 մլն դրամ։
Ըստ նախարար Ժաննա Անդրեասյանի խոշորագույն նախագծերից է Ակադեմիական քաղաքի ծրագիրը, որի մասին բազմիցս խոսվել է: ԿԳՄՍ նախարարը հիշեցրել է՝ Կառավարության վերջին երկու նիստերի ընթացքում կայացվել են երկու կարևոր որոշումներ. նախ հաստատվել է Ակադեմիական քաղաքի հայեցակարգը, իսկ նախորդ նիստում՝ մեկ անձնից գնման եղանակով ճարտարապետական ընկերության հետ պայմանագրի կնքման գործընթացը:
«Հոկտեմբերի 30-ի դրությամբ մենք արդեն ունենք կնքված պայմանագրեր գերմանական «ՋիԷմՓի ինթերնեյշնլ» ընկերության հետ, որի տեղական գործընկերը լինելու է Ճարտարապետության և շինարարության Հայաստանի ազգային համալսարանը: Գլխավոր հատակագծի մշակման և նախագծման մասով արժեքը կազմելու է մինչև 854 հազար 100 եվրո: Ակադեմիական քաղաքի համար երկու հիմնական տեղամաս է առանձնացված: Հիմնական տեղամասը լինելու է 17-րդ թաղամասին հարող տարածքը՝ ավելի քան 600 հեկտար: Պահեստային տեղամասը «Հայֆիլմ» կինոստուդիայի տարածքն է՝ ևս 100 հեկտարով: Հնարավոր է՝ գլխավոր հատակագծի մշակման աշխատանքներում պարզ դառնա, որ միայն հիմնական տեղամասը բավարար է ամբողջ նախագծվելիք ենթակառուցվածքը ստանալու համար: Այս դեպքում գումարն ամբողջությամբ չի օգտագործվի, և «Հայֆիլմ» կինոստուդիայի տարածքի աշխատանքներում ընթացք չի տրվի: Ըստ պայմանագրի՝ Ճարտարապետության և շինարարության Հայաստանի ազգային համալսարանը տեղում երկրաբանական և գեոդեզիական չափագրման աշխատանքներ է իրականացնելու: Այս աշխատանքների համար էլ նախատեսված է մինչև 212 մլն դրամ»,— ներկայացրել է Ժաննա Անդրեասյանը:
Նրա խոսքով՝ աշխատանքներն արդեն մեկնարկել են, իսկ նոյեմբերին նախատեսվում է գերմանացի ճարտարապետների այցը Հայաստան:
Հիշեցնենք, որ 2023 թվականի մարտի 25-ին վարչապետ Նիկոլ Փաշինյանը Աշտարակ և Պռոշյան համայնքների միջնամասից ուղիղ եթեր է դուրս եկել և հայտնել հանրությանը՝ «(Ակադեմիական քաղաքի) նախագիծը սկսվելու է «Հայֆիլմի» տարածքից, որտեղ տեղակայվելու է արվեստների կլաստերը՝ արվեստների ավագ դպրոցով եւ համալսարանով։ Կունենանք ժամանակակից համերգասրահ»։
2023 թվականի օգոստոսի 7-ին դատախազությունը հրապարակեց մամլո հաղորդագրություն «Հայֆիլմ» կինոստուդիայի հափշտակության գործով և նկատի ունենալով, որ ուսումնասիրության ընթացքում հայտնաբերվել են Պետական գույքի կառավարման կոմիտեի պաշտոնատար անձանց կողմից առերևույթ հանցանք կատարելու, ինչպես նաև պատմամշակութային արժեքների հափշտակության դեպքեր՝ 2023 թվականի հուլիսի 3-ին դատախազի կողմից հանցանքի մասին հաղորդում է ներկայացվել Քննչական կոմիտե։
Այս մասին ավելի մանրամասն ԿինոՊրեսը գրել էր ««Հայֆիլմ». Կինոստուդիա թե՞ նավթահանք» հոդվածում:
