Երևանի 23-րդ «Ոսկե ծիրան» միջազգային կինոփառատոնն ավարտվել է։ Կինոյի տանն անցկացված փակման հանդիսավոր արարողության ընթացքում հայտարարվել են փառատոնի մրցանակակիրները։ «ԿինոՊրես»-ը փոխանցում է մրցութային ծրագրերի արդյունքները։
Միջազգային լիամետրաժ ֆիլմերի մրցույթում փառատոնի գլխավոր մրցանակին՝ «Ոսկե ծիրանին», արժանացել է Մելագրոս Մումենթալերի «Հոսանքներ» (The Currents) ֆիլմը։ «Արծաթե ծիրանը» շնորհվել է Մորթեզա Ահմադվանդի և Ֆիրուզե Խոսրովանի «Անցյալ․ ապառնի․ շարունակական» (Past, Future, Continuous) ֆիլմին։ Սեբաստիան Բրամեսհուբերի «Լոնդոն» (London) ֆիլմն արժանացել է միջազգային ժյուրիի հատուկ հիշատակման։
Տարածաշրջանային մրցույթում «Ոսկե ծիրանը» ստացել է Ամիր Ազիզիի «Ամիրի հոգում» (Inside Amir) ֆիլմը, իսկ «Արծաթե ծիրանը»՝ Ալեքսանդրե Քոբերիձեի «Չորացած տերև» (Dry Leaf) կինոնկարը։ Վերջինս արժանացել է նաև Կինոմամուլի միջազգային ֆեդերացիայի՝ FIPRESCI-ի մրցանակին։
Կարճամետրաժ ֆիլմերին նվիրված «Կորիզ» մրցույթում «Ոսկե ծիրանը» շնորհվել է Սերուժ Հովսեփյանի «Մենավոր երկխոսություններ» (Dialogues Solitaire) ֆիլմին։ Ֆիլմն արժանացել է նաև Գենադի Մելքոնյանի անվան հատուկ մրցանակին։
«Կորիզ» մրցույթի «Արծաթե ծիրանը» ստացել է Օվսաննա Գևորգյանի «Վարձու սգավորներ» (Paid Mourners) ֆիլմը։ Ժյուրիի հատուկ հիշատակումների են արժանացել Սոնա Խաչատրյանի «Ռելիքվիա» (Relic) և Արթուր Սահակյանի «Մենակ երկուսով» (Together Alone) ֆիլմերը։
Թերեզա Նվոտովայի «Հայրը» վենետիկյան պրեմիերա ունեցած ֆիլմին շնորհվել է Հայաստանում և Վրաստանում տարածման մրցանակը։ Այն ներառում է 6 հազար եվրոյի դրամական աջակցություն՝ ֆիլմի տարածաշրջանային տարածումն ապահովելու նպատակով։
23-րդ «Ոսկե ծիրան» միջազգային կինոփառատոնը եզրափակվել է Գոդֆրի Ռեջոյի «Ժուկով-ժամանակին» ֆիլմի պրեմիերայով։
