Կաննի կինոփառատոնի զուգահեռ բաժնի՝ «Քննադատների շաբաթ»-ի Next Step Studio Armenia 2027 ծրագրի համար ընտրվել են հայ ռեժիսորներ Արմիկ Իսրայելյանը, Սոնա Խաչատրյանը, Րաֆֆի Մովսիսյանը և Նաիրա Սարգսյանը։ Նրանց անունները հայտարարվել են Երևանի «Ոսկե ծիրան» 23-րդ միջազգային կինոփառատոնի շրջանակում։
Հայ ռեժիսորներից յուրաքանչյուրը կաշխատի մեկ միջազգային ռեժիսորի հետ։ Ստեղծագործական զույգերը համատեղ կգրեն և կնկարահանեն մեկական կարճամետրաժ ֆիլմ։ Զույգերի կազմը կհայտարարվի օգոստոսի 19-ին՝ Սարաևոյի կինոփառատոնի CineLink հարթակի փակման արարողության ժամանակ։
Չորս ֆիլմերի նկարահանումները նախատեսված են 2027 թվականի մարտին Երևանում։ Դրանք կնկարահանվեն հայերենով՝ ամբողջությամբ հայկական դերասանական կազմի և նկարահանող խմբի մասնակցությամբ։ Ֆիլմերի համաշխարհային պրեմիերաները կկայանան 2027 թվականին Կաննում անցկացվող «Քննադատների շաբաթ»-ի շրջանակում։
Next Step Studio Armenia-ն ստացել է 25 հայտ։ Հայ և ֆրանսիացի պրոդյուսերները կազմել են 12 նախագծից բաղկացած կարճ ցուցակ, իսկ ռեժիսորների հարցազրույցներն անցկացվել են հուլիսի 16-ին Երևանի Կինոյի տանը։
Ընտրող հանձնաժողովում ընդգրկված էին «Քննադատների շաբաթ»-ի կարճամետրաժ ֆիլմերի և Next Step ծրագրերի համակարգող Ժուլիետ Քենոնը, Next Step Studio-ի համադրող և պրոդյուսեր Դոմինիկ Վելինսկին և ծրագրի հայաստանյան պրոդյուսեր Արտյոմ Բաղդասարյանը։
Ծրագիրն իրականացվում է ՀՀ կրթության, գիտության, մշակույթի և սպորտի նախարարության աջակցությամբ՝ Հայաստանի կինոռեժիսորների և պրոդյուսերների գիլդիայի հետ համագործակցությամբ։
