Հոմերոսի «Ոդիսականի» հիման վրա մշակվում է «Ոդիսևս» (Odysseus) աշխատանքային անվանումը կրող նոր հեռուստասերիալ, որի նկարահանումների մի մասը նախատեսվում է իրականացնել Հայաստանում։ Ինչպես տեղեկացնում է Deadline-ը՝ միջազգային նախագծի արտադրությունը նախատեսվում է սկսել 2027 թվականի սկզբին։
Սերիալը ստեղծվում է որպես անկախ եվրոպա-ամերիկյան համատեղ արտադրություն և կապված չէ Քրիստոֆեր Նոլանի «Ոդիսականը» լիամետրաժ ֆիլմի հետ։ Նախագծի վրա համատեղ աշխատում են հունական Tanweer Productions, ամերիկյան Tectonic և հայ-ամերիկյան USATV ընկերությունները։ Նկարահանումները նախատեսվում է անցկացնել Հունաստանի և Հայաստանի տարածքներում։
Նախագծի շոուրաները Կառլ Գայդուսեկն է, որը որպես գործադիր պրոդյուսեր և շոուրաներ աշխատել է Netflix-ի «Շատ տարօրինակ գործեր» (Stranger Things) սերիալի առաջին եթերաշրջանի վրա։ Բեմադրիչը Ռոել Ռեյնեն է՝ «Հալո» (Halo), «Սև առագաստներ» (Black Sails) և «Վուի մարդասպանները» (Wu Assassins) սերիալների առանձին դրվագների ռեժիսորը։
Փորձնական սերիայի սցենարը գրել են Շոն Ֆայնեգանը, Սքոթ Վինդհաուզերը, Նոա Լանգը և Բլեյք Հոսը։ Ստեղծագործական խումբը նախագիծը ներկայացնում է որպես Հոմերոսի էպոսի պատմականորեն ավելի իրատեսական մեկնաբանություն։
Սերիալի հեղինակները մտադիր են առասպելական պատումը տեղափոխել բրոնզեդարյան իրական միջավայր՝ կենտրոնանալով ոչ թե աստվածների և գերբնական էակների, այլ պատերազմի, իշխանության, դավաճանության, ծովային ճանապարհորդությունների և գոյատևման համար պայքարող մարդկանց վրա։ Պատմությունը կանդրադառնա նաև բրոնզի դարի քաղաքակրթությունների անկմանը նախորդած ցնցումներին, որոնք հետագայում առասպելների հիմք են դարձել։
Գայդուսեկի խոսքով՝ նախագիծը Ոդիսևսի պատմությունը ներկայացնելու է հնարավորինս իրատեսական և քաղաքական տեսանկյունից։ Հեղինակները ցանկանում են բացահայտել Հոմերոսի նկարագրած առասպելական փորձությունների հետևում գտնվող մարդկային ընտրությունները, կորուստներն ու հարաբերությունները և հանդիսատեսին ծանոթացնել այն իրական պատմական աշխարհին, որտեղ կարող էր ձևավորվել հերոսի մասին պատումը։
Պրոդյուսեր Ջորդան Դիքստրան նշել է, որ ստեղծագործական խումբը նախագծի գաղափարի վրա աշխատել է շուրջ հինգ տարի։ Նպատակն է ստեղծել հին հունական աշխարհի հավաստի և դիտարժան պատկեր, իսկ հաջողության դեպքում՝ պատմությունն ընդլայնել մեկ եթերաշրջանի սահմաններից դուրս՝ ձևավորելով հին Հունաստանի պատմության և դիցաբանության վրա հիմնված ավելի լայն հեռուստատեսային աշխարհ։
Դերասանական կազմը, նկարահանումների ճշգրիտ վայրերը և սերիալի թողարկման ժամկետները դեռևս չեն հրապարակվել։
