Ռուսաստանում հունվարի 29-ին կինոթատրոններում թողարկվելու է «Ոսկե դուբլ» («Золотой дубль») գեղարվեստական ֆիլմը, որը պատմում է խորհրդային ֆուտբոլի պատմության ամենախորհրդանշական էջերից մեկի մասին՝ Նիկիտա Սիմոնյանի և երևանյան «Արարատի» լեգենդար մրցաշրջանի շուրջ։
Ֆիլմի կենտրոնում է «Սպարտակի» անվանի ֆուտբոլիստ Նիկիտա Սիմոնյանի կերպարը, ով դառնում է երևանյան «Արարատի» գլխավոր մարզիչը և իր առջև դնում գրեթե անհնարին նպատակ՝ իրականացնել «ոսկե դուբլը», այսինքն՝ միաժամանակ նվաճել ԽՍՀՄ առաջնության ոսկե մեդալն ու ԽՍՀՄ գավաթը։ Սակայն ճանապարհը դեպի հաղթանակը հարթ չէ․ թիմը սկզբում չի ընդունում նոր մարզչին, իսկ գլխավոր մրցակիցը պատրաստ է ամեն քայլի՝ հաղթանակի հասնելու համար։
Սյուժեն կառուցված է ոչ միայն սպորտային պայքարի, այլև մարդկային հակասությունների, թիմային վստահության ձևավորման և կամքի հաղթանակի շուրջ։ Ֆիլմը ներկայացնում է մի ժամանակաշրջան, երբ ֆուտբոլը ԽՍՀՄ-ում պարզապես խաղ չէր, այլ մեծ սոցիալական ու գաղափարական նշանակություն ունեցող երևույթ։
Ֆիլմի դիստրիբյուտորն է ռուսական «Ատմոսֆերա կինո» ընկերությունը։ «Ոսկե դուբլը» AP Cinema կինոընկերության և START առցանց կինոթատրոնի համատեղ նախագիծն է, որը իրականացվել է Ռուսաստանի Դաշնության մշակույթի նախարարության աջակցությամբ:
Ռուսաստանի Դաշնության մշակույթի նախարարության աջակցությամբ։ Ռեժիսորն է Մհեր Մկրտչյանը («Իշխանություն», «Լյուդվիգ անունով ոզնին»), ով այս նախագծում պատմական իրադարձությանը անդրադարձել է ժամանակակից կինեմատոգրաֆիական լեզվով։
Նկարահանումները տեղի են ունեցել թե՛ Ռուսաստանում, թե՛ Հայաստանում։ Ֆիլմում օգտագործվել է շուրջ 170 լոկացիա, որոնք հնարավորություն են տվել առավել ամբողջական կերպով վերարտադրել ժամանակաշրջանի բոլոր նրբությունները և պատմությանը հաղորդել տեսողական հագեցվածություն ու յուրահատկություն։ Նկարահանումներին մասնակցել են 207 դերասան և ավելի քան 500 զանգվածային տեսարանների դերակատարներ։
Հայկական նկարահանման հիմնական վայրը եղել է Երևանի «Հրազդան» մարզադաշտը՝ այն պատմական տարածքը, որտեղ «Արարատը» ժամանակին իր հաղթանակն է տարել և դարձել խորհրդային ֆուտբոլի խորհրդանիշներից մեկը։ Այս հանգամանքը ֆիլմին հաղորդում է լրացուցիչ վավերականություն և հուզական շերտ՝ կապելով կինեմատոգրաֆիան իրական պատմության հետ։
Հայաստանում «Ոսկե դուբլ» ֆիլմը կինոթատրոններում կհայտնվի փետրվարի 5-ից։ Ֆիլմը հետաքրքիր կլինի ոչ միայն ֆուտբոլի սիրահարների, այլև բոլոր նրանց համար, ովքեր գնահատում են պատմությունները մարդկային ուժի, նվիրումի և հաղթանակի մասին։
«Ոսկե դուբլը» խոստանում է դառնալ ոչ միայն սպորտային դրամա, այլև պատմական հիշողության կինեմատոգրաֆիական վերարտադրություն՝ նվիրված «Արարատի» հաղթանակին և այն մարդկանց, ովքեր այդ հաղթանակը դարձրեցին հնարավոր։
