Երևանի կարճամետրաժ ֆիլմերի 9-րդ միջազգային կինոփառատոնը կանցկացվի հունիսի 25-29-ը՝ Երևանում և Գյումրիում։ Փառատոնի բացման արարողությունը նախատեսված է հունիսի 25-ին, ժամը 19:00-ին՝ Կինոյի տան մեծ դահլիճում։ Փառատոնը կշարունակվի նաև Գյումրիում․ հունիսի 28-ին միջոցառումներ կանցկացվեն Թումո Գյումրիում, իսկ հունիսի 29-ին «Հոկտեմբեր» կինոթատրոնում տեղի կունենա փակման արարողությունը։
Փառատոնի բոլոր միջոցառումների մուտքն ազատ է։
«Արմենպրես»-ի մամուլի սրահում կայացած ասուլիսի ընթացքում փառատոնի տնօրեն Գուժ Թադևոսյանը նշեց, որ այս տարի փառատոնը Երևանից բացի կանցկացվի նաև Շիրակի մարզում։ Նրա խոսքով՝ մարզերում փառատոնային միջոցառումներ անցկացնելու ավանդույթը կարևոր է ինչպես մարզային մշակութային կյանքի ակտիվացման, այնպես էլ Հայաստանի կինոլոկացիաները միջազգային մասնակիցներին ներկայացնելու տեսանկյունից։
Երևանի քաղաքապետի տեղակալ Լևոն Հովհաննիսյանը հայտնեց, որ Երևանի քաղաքապետարանը չորրորդ տարին անընդմեջ հանդիսանում է փառատոնի գլխավոր հովանավորը։ Նրա խոսքով՝ այս տարի քաղաքապետարանը փառատոնին հատկացրել է 20 մլն դրամ։
Հովհաննիսյանը նաև ներկայացրեց քաղաքապետարանի աջակցության ծավալը նախորդ տարիների կտրվածքով։ 6-րդ փառատոնին քաղաքապետարանը հատկացրել է 12 մլն դրամ, 7-րդին՝ 20 մլն դրամ, 8-րդին՝ 19 մլն դրամ, իսկ 9-րդին՝ 20 մլն դրամ։ Ընդհանուր առմամբ, Երևանի քաղաքապետարանի աջակցությունը չորս տարվա ընթացքում կազմել է 71 մլն դրամ։
«ԿինոՊրես»-ի տեղեկություններով՝ 2026 թվականին փառատոնին աջակցություն է տրամադրել նաև ՀՀ կրթության, գիտության, մշակույթի և սպորտի նախարարությունը։ ԿԳՄՍ նախարարության աջակցությունը կազմել է 12 մլն դրամ՝ ներառյալ ԱԱՀ-ն։ Այսպիսով, Երևանի կարճամետրաժ ֆիլմերի 9-րդ միջազգային կինոփառատոնի հանրային աջակցությունը 2026 թվականին կազմում է առնվազն 32 մլն դրամ՝ ներառյալ ԱԱՀ-ն։
Ուշագրավ է, որ երկրորդ տարին անընդմեջ ԿԳՄՍ նախարարի տեղակալ Դանիել Դանիելյանը փառատոնի ներկայացման ընթացքում խոսում է պետական աջակցության կարևորության, փառատոնի համապատասխանության և մշակութային քաղաքականության նպատակների մասին, սակայն չի հրապարակում նախարարության կողմից տրամադրված աջակցության չափը։ 2025 թվականին ԿԳՄՍ նախարարության աջակցությունը կազմում էր մոտ 4 մլն դրամ, իսկ 2026 թվականին՝ 12 մլն դրամ։
Ասուլիսի ընթացքում Դանիելյանը առաջարկեց «հովանավոր» բառի փոխարեն օգտագործել «գործընկեր» ձևակերպումը։ Նրա խոսքով՝ կառավարության մշակած ծրագրերի և քաղաքականության տրամաբանության մեջ կարևոր է պետական, մասնավոր և այլ կառույցների միջև համագործակցությունը։ Փոխնախարարը նշեց, որ Երևանի կարճամետրաժ ֆիլմերի միջազգային կինոփառատոնը պետական ֆինանսավորման արժանի փառատոններից է, քանի որ այն համահունչ է կառավարության մշակութային քաղաքականության նպատակներին՝ մարզերում մշակութային կյանքի ակտիվացում, երիտասարդների ներգրավում և Հայաստանի միջազգային ներկայության ընդլայնում։
Փառատոնի ծրագրերի տնօրեն Արտյոմ Բաղդասարյանի ներկայացմամբ՝ այս տարի փառատոնը հայտեր է ստացել 95 երկրից։ Մրցութային ծրագրում ընդգրկվել է 39 ֆիլմ՝ 22 երկրից։ Դրանցից 24-ը միջազգային ծրագրում են, իսկ 15-ը՝ ազգային մրցութային ծրագրում։ Ազգային ծրագրի համար ներկայացվել է 45 հայկական ֆիլմ՝ 2025 և 2026 թվականների արտադրության։
Բաղդասարյանը նաև նշել է, որ այս տարի փառատոնն ընդունել է արհեստական բանականությամբ ստեղծված ֆիլմեր։ Նրա խոսքով՝ միջազգային ծրագրում ընդգրկված են նաև հեղինակավոր միջազգային փառատոներում մասնակցած և մրցանակներ ստացած կարճամետրաժ ֆիլմեր։
Փառատոնի ընթացքում նախատեսված են ֆիլմերի ցուցադրություններ, վարպետության դասեր, պանելային քննարկումներ, հանդիպումներ և փորձի փոխանակման ձևաչափեր։ Կազմակերպիչների փոխանցմամբ՝ այս տարի մասնավոր հատվածի մասնակցությունն ավելացել է․ հայտարարվել է շուրջ երեք տասնյակ գործընկերների մասին։
Փառատոնի շրջանակում նախատեսված են նաև խրախուսական ձևաչափեր ազգային ծրագրի մասնակիցների համար։ Երևանի քաղաքապետարանը դրամական մրցանակներ կհանձնի ազգային ծրագրի երեք լավագույն կարճամետրաժ ֆիլմերին, իսկ գործընկերներից մեկը ազգային ծրագրի մասնակցին կտրամադրի 2 մլն դրամ արժողությամբ կինոտեխնիկայից օգտվելու սերտիֆիկատ։
Այս տարվա ժյուրին գլխավորում է վրացի կինոռեժիսոր Սոսո Բլիաձեն։ Ժյուրիի անդամներն են դերասանուհի, պրոդյուսեր Իննա Խոջամիրյանը և կինոռեժիսոր Աշալույս Հարությունյանը։
Փառատոնի բացման ֆիլմն է իրանական «Մշուշը վերացել է» կարճամետրաժը։
