Ամերիկյան կինոարվեստի և գիտության ակադեմիան հրապարակել է 2026 թվականին անդամակցության հրավեր ստացած 529 կինոգործիչների և ոլորտի ներկայացուցիչների ցանկը։ Նրանց թվում կան նաև հայկական անուններ․ Հայաստանը ներկայացնում է կինոօպերատոր Սուրեն Թադևոսյանը, իսկ ցուցակում ընդգրկված են նաև հայկական սփյուռքի ներկայացուցիչներ Ալին Քեշիշյանը, Ջոշ Հարությունյանը և Նատալի Մուստեատան։
Սուրեն Թադևոսյանը հրավիրվել է Ակադեմիայի կինոօպերատորների ճյուղ։ Պաշտոնական ցուցակում նրա անվան կողքին նշված են «Յաշան ու Լեոնիդ Բրեժնևը» և «Մեդալի հակառակ կողմը» ֆիլմերը։
Թադևոսյանը հայ կինոօպերատոր և լուսանկարիչ է։ Նա ծնվել է Երևանում, աշխատել է ինչպես խաղարկային, այնպես էլ վավերագրական ֆիլմերի վրա՝ Հայաստանում և արտերկրում։ Նա Հայաստանի կինեմատոգրաֆիստների միության, Հայաստանի ազգային կինոակադեմիայի, Հայաստանի կինոօպերատորների գիլդիայի և IMAGO կինոօպերատորների միջազգային ֆեդերացիայի անդամ է։
Հայկական սփյուռքի ներկայացուցիչներից Ակադեմիայի նոր հրավիրյալների թվում է նաև Ալին Քեշիշյանը։ Նա ընդգրկված է դերասանների ներկայացուցիչների (Artist Representatives) ուղղության ցանկում։ Քեշիշյանը հայտնի մենեջեր և պրոդյուսեր է, որը երկար տարիներ աշխատում է Հոլիվուդի խոշոր դերասանների և ստեղծագործողների հետ։
Մարքեթինգ և հանրային կապեր (Marketing and Public Relations) ուղղությամբ հրավեր է ստացել Ջոշ Հարությունյանը՝ Divergent PR ընկերության ներկայացուցիչներից մեկը։ Նա կինոարդյունաբերության մեջ հայտնի է որպես փիար-մասնագետ և մրցանակային քարոզարշավների ռազմավար։
Կարճամետրաժ ֆիլմերի բաժնում ընդգրկվել է նաև Նատալի Մուստեատան՝ «Two People Exchanging Saliva» կարճամետրաժ ֆիլմի համահեղինակը։ Մուստեատան ավելի վաղ խոսել էր իր հայկական արմատների մասին՝ նշելով, որ մայրական կողմից նրա տատը՝ Լուիզա Դերդերյանը, հայկական ընտանիքից էր։
Ակադեմիայի տվյալներով՝ այս տարվա հրավիրյալների թվում կան «Օսկարի» 95 հավակնորդներ, այդ թվում՝ 21 մրցանակակիր։ Հրավիրյալների 53 տոկոսը ներկայացնում է ԱՄՆ-ից դուրս գտնվող 60 երկիր և տարածք։
Միևնույն ժամանակ, Ակադեմիան ընդգծում է, որ հրավերը դեռևս չի նշանակում անդամակցություն։ 2026 թվականին Ակադեմիայի անդամ կդառնան միայն այն կինոգործիչներն ու ոլորտի ներկայացուցիչները, որոնք կընդունեն հրավերը։
