Աշխատարաններ սկսնակների համար՝ կարճ խաղարկային և վավերագրական ֆիլմերի համար

Հայաստանում EUNIC կլաստերը՝ համագործակցելով Մելիք Կարապետյանի և Եվրոպական Միության պատվիրակության հետ Հայաստանում, ուրախ է հայտարարելու բաց կանչ՝ մասնակցելու երկու մասնագիտացված աշխատարանների, որոնք նվիրված են մինչև 30 րոպե տևողությամբ կարճ խաղարկային և վավերագրական ֆիլմերի զարգացմանը։ Աշխատարանները կանցկացվեն Հայաստանում Եվրոպական կինոփառատոնի ծրագրի շրջանակում՝ 2025թ․ մայիսի 24–30-ը։

Միջազգային ճանաչում ունեցող կինոգործիչների՝ Ռոբերտ Հոսպյանի (Ֆրանսիա, խաղարկային ֆիլմեր) և Մարատ Սարգսյանի (Լիտվա, վավերագրական ֆիլմեր) ղեկավարությամբ, մասնակիցները ներգրավվելու են ինտենսիվ քննարկումների և նախագծերի զարգացման գործընթացում։ Աշխատարանները նպատակ ունեն աջակցել կարճամետրաժ ֆիլմերի ստեղծագործական նախնական փուլերին։

Ո՞վ կարող է դիմել.

Մենք հրավիրում ենք սկսնակ կինոգործիչների՝ ռեժիսորներ և/կամ պրոդյուսերներ, որոնք աշխատում են իրենց առաջին կամ երկրորդ կարճամետրաժ ֆիլմի վրա՝ խաղարկային կամ ոչ խաղարկային։ Նախագծերը պետք է լինեն վաղ զարգացման փուլում։

Դիմումի անհրաժեշտ փաստաթղթերը.

• Կենսագրական (անգլերեն)

• Նախորդ աշխատանքների պորտֆոլիո կամ տեղեկություն (ցանկալի է՝ հղումներով)

• Մեկ էջանոց սինոփսիս՝ խաղարկային ֆիլմի համար / գաղափարի նկարագիր՝ ոչ խաղարկայինի համար

• Թրիթմենթ կամ սցենարի նախնական տարբերակ (եթե առկա է) – մինչև 30 րոպե տևողությամբ ֆիլմերի համար

• Ռեժիսորի կամ պրոդյուսերի ուղերձ/մոտիվացիոն նամակ՝ ներկայացնող նախագծի նպատակը

• Ընտրված մասնակիցներին կտեղեկացնենք մայիսի 21-ին

• Սեմինարը բաղկացած է լինելու խմբային և անհատական ​​հանդիպումներից, ուստի խնդրում ենք ամրագրել մայիսի 25-ից 30 ժամանակահատվածը:

• Ծրագրի վերջում միջազգային ժյուրին կընտրի երկու հաղթողների՝ խաղարկային ​​և վավերագրական ​​կատեգորիաների համար՝ 500 եվրո մրցանակով:

• Դիմումի լեզուն՝ անգլերեն

• Աշխատարանների աշխատանքային լեզուն՝ անգլերեն, հայերեն թարգմանությամբ/աջակցությամբ

Դիմումների վերջնաժամկետը.

Բոլոր նյութերը պետք է ուղարկել info.jerewan@goethe.de և eva.khachatryan.extern@goethe.de էլ․ հասցեին ոչ ուշ քան 2025 թ․ մայիսի 15-ը՝ Երևանի ժամանակով 23:59։

Նամակի վերնագրում (subject line) անհրաժեշտ է նշել խաղարկային կամ վավերագրական կատեգորիա։

Ուշացած դիմումները չեն դիտարկվի։

Աշխատարանի ծրագիրը՝

Կարճ խաղարկային ֆիլմերի աշխատարան՝ Ռոբերտ Հոսպյան (Ֆրանսիա)

Աշխատարանը նախատեսված է այն կինոգործիչների համար, ովքեր զարգացնում են մինչև 30 րոպե տևողությամբ կարճ խաղարկային ֆիլմեր՝ նախագծի սկզբնական փուլում։ Ռոբերտ Հոսպյանի ղեկավարությամբ մասնակիցները կկենտրոնանան հետևյալ թեմաների վրա․

• Գաղափարի մշակում՝ սյուժեի, կառուցվածքի և ժամանակակից հանդիսատեսին ուղղված առանցքային թեմաների հստակեցում

• Դերասանական կերպարներ և պատմողական աղեղ – Հերոսների զարգացում և հուզական հագեցված պատմության կառուցում

• Տեսողական պատմողականություն – Ինչպես տեսողական ընտրությունները կարող են հզորացնել սյուժեի հուզական ազդեցությունը

• Ֆինանսավորում և համատեղ արտադրություն – Ֆինանսավորման աղբյուրների հայտնաբերում և եվրոպական ու միջազգային համապրոդյուսերական գործընթացի ըմբռնում

• Նախագծի ներկայացում և կարծիքների փոխանակում – Աշխատարանի վերջում մասնակիցները կներկայացնեն իրենց նախագծերը և կստանան դիտարկումներ մենթորից ու խմբակիցներից

Կարճ ոչ խաղարկային ֆիլմերի աշխատարան – Մարատ Սարգսյան (Լիտվա)

Աշխատարանը նախատեսված է սկսնակ կինոգործիչների համար, որոնք զարգացնում են մինչև 30 րոպե տևողությամբ վավերագրական ֆիլմեր։ Մարատ Սարգսյանի ղեկավարությամբ մասնակիցները կքննարկեն՝

• Վավերագրական լեզվի ձևավորում – Հատուկ և իսկական հեղինակային մոտեցում՝ լինի դա դիտողական, մասնակցային կամ բացատրական ձևաչափ

• Իրական պատմությունների վերածումն ազդեցիկ սյուժեի – Պատմության կառուցում իրական դեպքերից և մարդկանցից՝ բարոյական սկզբունքների պահպանմամբ

• Կառուցվածք և հոսք – Ինչպես կառուցել պատմությունը՝ ռիթմի, դինամիկայի և տրամաբանական շարադրանքի միջոցով

• Ռեժիսորի/պրոդյուսերի դերը – Իրական թեմաների հետ աշխատանք, թեմայի հասանելիություն, ֆինանսական սահմանափակումներ և սպասումների կառավարում

• Տարածում և լսարանի հասանելիություն – Հասցեագրում, փառատոնների ընտրություն և կարճ վավերագրական ֆիլմերի տարածման ուղիներ

• Կարծիքների փոխանակում և համագործակցային զարգացում – Մասնակիցները կներկայացնեն իրենց նախագծերը՝ մենթորից և գործընկեր կինոգործիչներից արժեքավոր արձագանք ստանալու համար, ինչը կօգնի կատարելագործել իրենց մոտեցումը վավերագրական ժանրին։

Աշխատարանի նպատակը.

Այս աշխատարանների նպատակն է` աջակցել կարճ խաղարկային և վավերագրական ֆիլմերի վաղ զարգացման փուլերին՝ մասնակիցներին տրամադրելով ստեղծագործական, տեխնիկական և արտադրական գիտելիքների հզոր հիմք։ Անկախ նրանից՝ սա մասնակցի առաջին ֆիլմն է, թե երկրորդ, աշխատարանները կօգնեն զարգացնել նախագիծը, կապ հաստատել ոլորտի մասնագետների հետ և նպաստել ֆիլմի հաջող զարգացմանը և արտադրությանը։

Ռոբերտ Հոսպյան

Սկսելով աշխատել որպես սցենարիստ և կարճամետրաժ ֆիլմերի դերասան ՝ Ռոբերտ Հոսպյանը սկզբում սցենարներ է գրել այլ ֆիլմերի համար, մասնավորապես ՝ Quand on crie au loup կատակերգական մարտաֆիլմի համար, որը ստեղծվել է La Petite Reine-ի և ռեժիսոր Մերիլու Բերիի հետ համատեղ։ Ներկայումս նա աշխատում է La Traque գեղարվեստական ֆիլմի վրա դերասան և պրոդյուսեր Սոֆիան Զերմանիի համար, ինչպես նաև Reda & les vaches ֆիլմի վրա ՝ շվեյցարացի ռեժիսոր Դիլան Թահերի համար։ Տարբեր մեդիաներում գրելով՝ նա աշխատել է Les Passagers-ի ՝ les Produits Frais-ի հետ համատեղ վիրտուալ իրականության նախագծի, ինչպես նաև Star Wars Eclipse-ի ՝ Quantic Dream-ի ապագա տեսախաղի վրա: Նա մշակում է Wild & Sweet-ի արտադրած Jitters ինտերակտիվ սերիալը Նիկոլա Պեուֆայեի հետ համատեղ, ինչպես նաև Spoiler կատակերգական-դրամատիկական սերիալը, որը նա ստեղծել է Մաթյո Գոմպելի հետ միասին։ Միաժամանակ, նա պատրաստում է իր առաջին լիամետրաժ ֆիլմը՝ Red Flag, 2425 Films-ի համար։

Մարատ Սարգսյան

Ծնունդով հայաստանցի Մարատ Սարգսյանը կինոռեժիսորի իր կարիերան սկսել է դեռահաս տարիքում՝ աշխատելով տեղի հեռուստաստուդիայում։ Լիտվա տեղափոխվելուց հետո նա շարունակեց աշխատել հեռուստատեսությունում, որտեղ նաև դարձավ սեփական խոհարարական շոուի հաղորդավար և հաջող երաժշտական տեսահոլովակների ռեժիսոր։ 2005-ին Մարատը հեռացավ հեռուստատեսությունից և ընդունվեց Լիտվայի երաժշտության և թատրոնի ակադեմիայի կինոռեժիսուրայի բաժին: Նա շարունակեց իր ուսումը մագիստրոսի աստիճան ստանալու համար և ստեղծեց այնպիսի ֆիլմեր, ինչպիսիք են «Լեռնավան» (2009), որը ցուցադրվել և մրցանակներ է ստացել Վիլնյուսի կարճամետրաժ ֆիլմերի կինոփառատոնում, Կուստերնդորֆի կինոյի և երաժշտության միջազգային փառատոնում, Ոսկե ծիրան փառատոնում, Վիլնյուսի ՄԿՓ-ում, Թարգովա Film Street-ում, և «Հայր» ֆիլմը (2012), որը ցուցադրվել և մրցանակներ է ստացել Visions du Reel ՄԿՓ-ում, Կրակովի ՄԿՓ-ում, Վիլնյուսի վավերագրական ֆիլմերի միջազգային կինոփառատոնում, Լոբուսկի միջազգային կինոփառատոնում և այլ կինոփառատոններում։ 2020 թվականին Մարատը նկարահանել է իր նոր՝ «Ջրհեղեղ չի լինի» (2020) ֆիլմը, որը Վենետիկի կինոփառատոնում առաջադրվել է քննադատների միջազգային մրցանակի։