ԹՅՈՒՐՔՍՈՅ միջազգային կազմակերպության նախաձեռնությամբ Տաշքենդում ստեղծվել է Թյուրքական աշխարհի կինեմատոգրաֆիստների միություն (ասոցիացիա), հաղորդում է Astana TV-ն՝ վկայակոչելով կազմակերպության մամուլի ծառայությունը։
Միջոցառմանը մասնակցել են Ադրբեջանի Կինոյի գործակալության ղեկավար Օրհան Ֆիքրեթօղլին, «Ղազախֆիլմ» միավորման նախագահ Ազամաթ Սաթիբալդին, Ուզբեկստանի կինեմատոգրաֆիայի գործակալության ղեկավար Ֆիրդոս Աբդուհալիկովը, Թուրքիայի կինեմատոգրաֆիայի վարչության գլխավոր տնօրեն երկին Յիլմազոտը, Ղրղզստանի կինեմատոգրաֆիայի դեպարտամենտի տնօրեն Ակժոլ Բեկբոլոտովը, ինչպես նաև կինեմատոգրաֆիայի գծով ԹՅՈՒՐՔՍՈՅԻ ներկայացուցիչ Սալիմ Էզերը:
Ասոցիացիան ստեղծվել է թյուրքական աշխարհի կինոարվեստը վերակենդանացնելու, համատեղ կինոնախագծեր ստեղծելու, նոր ֆիլմեր համատեղ արտադրելու, ինչպես նաև լավագույն ֆիլմերը միջազգային ասպարեզ դուրս բերելու, թյուրքալեզու պետությունների ֆիլմերի համար կինովարձույթի միասնական համակարգ ստեղծելու համար:
Առաջնահերթություններից է Տաշքենդի միջազգային կինոփառատոնի և «Կորկուտ-Աթա» միջազգային կինոփառատոնի մակարդակի բարձրացումը համաշխարհային չափանիշներին: Ապագայում նախատեսվում է ստեղծել Թյուրքական աշխարհի կինոակադեմիա, որը հարթակ կդառնա թյուրքական ժողովուրդների համատեղ կինոնախագծերի համար:
