Աշխարհի և Եվրոպայի չեմպիոն Նազիկ Ավդալյանն անդրադարձել է իր կյանքի մասին նկարահանված «Մեդալի հակառակ կողմը» գեղարվեստական ֆիլմին, դրա ստեղծման արդյունքներին և ֆիլմի հեղինակ Աննա Մաքսիմի հետ հետագայում առաջացած տարաձայնություններին։ Մարզիկը թեմայի մասին խոսել է Ամալյա Հովհաննիսյանի և MONK3-ի «Դեպի արմատներ» հաղորդման ընթացքում։
Ավդալյանի խոսքով՝ անկախ հետագայում առաջացած խնդիրներից, ինքը դրական է գնահատում ֆիլմի ստեղծման փաստը և աշխատանքը համարում է հաջողված։ Նա հատկապես կարևորել է այն արձագանքը, որը ֆիլմը ստացել է հանդիսատեսից։
«Ես շատ ուրախ եմ, որ նկարահանվեց ֆիլմը։ […] Ես համարում եմ, որ ֆիլմը ստացված է։ Ինձ համար ամենակարևոր ձեռքբերումներից մեկը հենց դա է, որ այդ ֆիլմը շատերին ինչ-որ բան է տվել»,- ասել է Ավդալյանը։
Նրա գնահատմամբ՝ թեև ֆիլմը պատմում է մարզիկի և սպորտային ճանապարհի մասին, դրա պատմությունը կարող է հասանելի լինել նաև սպորտի հետ անմիջական կապ չունեցող հանդիսատեսին։ Ավդալյանը նշել է, որ մարդիկ ֆիլմում կարող են գտնել իրենց վերաբերող պատմություններ և մոտիվացիա։
Միաժամանակ մարզիկը հաստատել է, որ ֆիլմի ստեղծումից և պրեմիերայից հետո Աննա Մաքսիմի հետ հարաբերություններում տարաձայնություններ են առաջացել։ Սակայն դրանց բովանդակությունը նա մանրամասն չի բացահայտել և չի ներկայացրել որպես ստեղծագործական հաջողությունը «կիսելու» շուրջ վեճ։
«Ես ընդհանրապես կարիք չունեմ որևէ մի հաջողություն կիսելու։ Իմ մասին նկարահանվել է ֆիլմ, ես շատ ուրախ եմ, ստացված ֆիլմ է, ահռելի աշխատանք է տարվել»,- նշել է նա։
Ավդալյանի խոսքով՝ այս փորձից իր համար հիմնական հետևությունը իրավական հարաբերությունները դեռևս համագործակցության սկզբում հստակ կարգավորելու անհրաժեշտությունն է։ Նա նշել է, որ ֆիլմարտադրության ոլորտին ծանոթ չլինելու պատճառով իրավաբանի հետ սկսել է աշխատել ավելի ուշ՝ արդեն պրեմիերայից հետո։
«Եթե ինչ-որ մի գործ ես սկսում, եթե դու դաշտին ծանոթ չես, հենց սկզբից շատ լավ իրավաբանի հետ սկսես»,- ասել է մարզիկը՝ այդ խորհուրդը հասցեագրելով նաև այն մարդկանց, որոնց կյանքի մասին հետագայում կարող են ֆիլմեր նկարահանվել։
Թե կոնկրետ ինչ իրավական հարցերի շուրջ են կողմերի միջև տարաձայնություններ առաջացել, Ավդալյանը չի մանրամասնել։ Հարցազրույցում նրան նաև հարցրել են հնարավոր ֆինանսական տարաձայնությունների մասին։ Մարզիկն այդ համատեքստում հայտնել է, որ անձամբ ֆիլմի շահագործումից որևէ ֆինանսական կամ մոնետիզացիոն եկամուտ չի ստացել։
«Ֆինանսական ոչ մի բան չեմ ստացել ֆիլմից։ […] Իմ ամենամեծ ու կարևոր ձեռքբերումը […] մի արժեք է, որը ծառայում է իր նպատակին»,- ասել է նա։
Այս հայտարարությունը վերաբերում է հենց Ավդալյանի ստացած եկամտին և ինքնին չի նկարագրում ֆիլմի ընդհանուր ֆինանսական արդյունքները։ «Մեդալի հակառակ կողմը» միաժամանակ դարձել է վերջին տարիների ամենաբարձր կոմերցիոն ցուցանիշ գրանցած հայկական ֆիլմերից մեկը։
«ԿինոՊրես»-ի ավելի վաղ հրապարակած տվյալներով՝ ֆիլմը հայկական կինոթատրոններում ցուցադրվել է 31 վարձութային շաբաթ և գրանցել շուրջ 363 մլն դրամ համախառն կինոթատերական հասույթ։ Այդ թիվը վերաբերում էր Երևանի և մի քանի խոշոր քաղաքների 6-7 կինոթատրոնների հասանելի տվյալներին։ Հայաստանի մարզերում իրականացված առանձին ցուցադրությունների հասույթը այդ հաշվարկում ներառված չէ, քանի որ դրանց ամբողջական տվյալները հասանելի չեն եղել։ Հետևաբար ֆիլմի փաստացի ընդհանուր ցուցադրական հասույթը կարող է ավելի բարձր լինել։
Ֆիլմի նախնական հայտարարված բյուջեն կազմել էր շուրջ 90 մլն դրամ։ Դրանից 40 մլն դրամը տրամադրել էր Հայաստանի ազգային կինոկենտրոնը՝ պետական ֆինանսավորման շրջանակում, իսկ Գյումրու համայնքը քաղաքի նկարահանումների համար հատկացրել էր ևս 2,2 մլն դրամ։ Նախագիծը մրցույթին սկզբում ներկայացվել էր «Հոսանքին հակառակ» աշխատանքային անվանումով։
2025 թվականին հայտնի դարձավ նաև, որ ֆիլմի արտադրության համար պետական բյուջեից հատկացված շուրջ 40 մլն դրամը ամբողջությամբ վերադարձվել է արդեն Հայաստանի կինոյի հիմնադրամի բյուջե։
