Հայաստանի կինոյի հիմնադրամը տեղեկացնում է, որ ֆրանսիական Kissani Films ընկերությունը, հղում կատարելով դեռևս 1990-ական թվականներին կնքված պայմանագրին, պնդումներ է ներկայացրել հայկական կինոժառանգության կազմում ընդգրկված մոտ 250 ֆիլմերի նկատմամբ բացառիկ իրավունքներ ունենալու վերաբերյալ։
Հիմնադրամի փոխանցմամբ՝ հարցի կարևորության և դրա շուրջ առաջացած իրավական հանգամանքների բազմակողմանի ուսումնասիրության անհրաժեշտության պատճառով որոշվել է ժամանակավորապես հետաձգել Անսիի միջազգային անիմացիոն կինոփառատոնի Annecy Classics բաժնում նախատեսված հայկական ծրագիրը։
Միևնույն ժամանակ Հայաստանի կինոյի հիմնադրամը չի բացահայտում մանրամասներ։ Հիմնադրամի հաղորդագրությունը իրավիճակը ներկայացնում է ընդհանրացված ձևով՝ նշելով միայն, որ խոսքը վերաբերում է 1990-ականներին կնքված պայմանագրին և հայկական կինոժառանգության մաս կազմող շուրջ 250 ֆիլմերի նկատմամբ բացառիկ իրավունքների մասին պնդումներին։
Նշենք, որ 1990-ական թվականներին «Հայֆիլմը» որպես հայկական ֆիլմաֆոնդի սեփականատեր ինքնուրույն էր տնօրինում ֆիլմերի նկատմամբ իրավունքները։ Այդ շրջանում երկարաժամկետ պայմանագրեր են կնքվել տարբեր երկրների կազմակերպությունների հետ, որոնց իրավական հետևանքներն այսօր կարող են անդրադառնալ հայկական կինոժառանգության միջազգային ներկայացման գործընթացի վրա։
Հավանական է, որ հարցերը ծագել են հենց Անսիի փառատոնի շրջանակում՝ հաշվի առնելով, որ Ռոբերտ Սահակյանցի «Կացինը» ֆիլմը նախկինում ներկայացված է եղել Անսիի փառատոնում, իսկ փառատոնի արխիվային տվյալներում ֆիլմի արտադրության բաժնում նշված են Kissani Films-ը և Krikor Hamel-ը։ Սա կարող է բացատրել, թե ինչու իրավական հարցը ակտուալացել է հենց Annecy Classics-ում նախատեսված հայկական ծրագրի համատեքստում։
Հայաստանի կինոյի հիմնադրամը հայտնում է, որ ստեղծված իրավիճակի առնչությամբ կիրականացվի համապարփակ ուսումնասիրություն՝ ներգրավելով համապատասխան մասնագիտական և իրավասու կառույցներին։ Ուսումնասիրության արդյունքների հիման վրա կձեռնարկվեն անհրաժեշտ քայլեր՝ առաջնորդվելով Հայաստանի Հանրապետության օրենսդրությամբ, հայկական կինոժառանգության պահպանության և պետական շահի պաշտպանության սկզբունքներով։
