Եվրոպական կինոակադեմիան հրապարակել է 2026 թվականին ընդունված նոր անդամների ամբողջական ցանկը։ Այս տարի ակադեմիան ընդունել է 640 կինոմասնագետի 50 երկրից, իսկ կառույցի անդամների ընդհանուր թիվը հասել է 5700-ի՝ 60 երկրում։
Հայաստանից նոր անդամների ցանկում նշված են դերասան Սամվել Թադևոսյանը և ռեժիսոր Շողակաթ Վարդանյանը։ Ակադեմիայի հաղորդագրության մեջ Թադևոսյանը նաև առանձնացված է մինչև 36 տարեկան կինոգործիչների համար նախատեսված Emerging Membership ձևաչափի նոր անդամների շարքում։
2026 թվականից Եվրոպական կինոակադեմիան թարմացրել է մինչև 36 տարեկան կինոմասնագետների անդամակցության չափանիշները։ Emerging Membership-ի համար կարող են դիմել այն մասնագետները, որոնք որպես բաժնի ղեկավար նշանակալի աշխատանք ունեն մեկ լիամետրաժ՝ 70 րոպեից երկար ֆիլմում կամ, նոր կարգով, երեք կարճամետրաժ՝ խաղարկային, վավերագրական կամ անիմացիոն ֆիլմերում։ Այդ աշխատանքները պետք է ցուցադրված լինեն FIAPF-ի կողմից հավատարմագրված մրցութային փառատոնի պաշտոնական բաժնում, European Short Film Network-ի գործընկեր փառատոններից մեկում կամ առաջադրված լինեն ազգային կինոակադեմիայի կողմից։ Չափանիշներին համապատասխանելու դեպքում կարող են դիմել նաև կինոուսանողները։
Նոր անդամների թվում են նաև ռեժիսորներ Լուկաս Դոնտը, Յոաքիմ Տրիերը, Մարկ Քազինսը, Պատրիսիա Մազյուն, դերասաններ Վիկի Կրիպսը, Ֆլորենս Կասումբան, Անտուան Ռեյնարցը, ինչպես նաև այլ կինոգործիչներ Եվրոպայից և եվրոպական կինոյի հետ կապված տարբեր երկրներից։
Ըստ ակադեմիայի՝ նոր անդամների 51%-ը կանայք են, 48%-ը՝ տղամարդիկ, 1%-ը նույնականանում է որպես ոչ բինար։ Նոր անդամների 19%-ը ներկայացնում է կինոյի տարբեր մասնագիտությունները, այդ թվում՝ օպերատորական արվեստը, մոնտաժը, ձայնային ձևավորումը, հագուստի ձևավորումը, դիմահարդարումը, արտադրական դիզայնը և այլ ուղղություններ։
Եվրոպական կինոակադեմիայի անդամները կարող են գրանցվել Եվրոպական կինոմրցանակաբաշխության քվեարկությանը և մասնակցել European Film Awards-ի կարճ ցուցակից ձևավորվող անվանակարգերի ու հաղթողների ընտրության գործընթացին։ Ակադեմիայի նախագահը 2024 թվականից Ժյուլիետ Բինոշն է։ Կառույցը հիմնադրվել է 1988 թվականին եվրոպական կինոյի մի շարք գործիչների նախաձեռնությամբ։
