Հունիսի 8-ին Երևանի Կինոյի տանը տեղի է ունեցել «ՄԷԿ ԿԱԴՐ» 24-րդ կարճ ֆիլմերի միջազգային փառատոնի բացումը։ Փառատոնն անցկացվում է հունիսի 8-15-ը Երևանում՝ «Արվեստի Բաց Հարթակ» կազմակերպության ջանքերով, ՀՀ ԿԳՄՍ նախարարության և փառատոնի գործընկերների աջակցությամբ։
Բացման ծրագիրը ներառել է «Խազեր» երգչախմբի հայկական ազգային-դասական երաժշտության կատարումները՝ հիմնված Կոմիտասի դպրոցի վրա։ Փառատոնը բացվել է ժամանակակից արվեստագետ Գրիգոր Խաչատրյանի «Միթե այսօր այն օրը չէ» կարճ ֆիլմով, որը հիմնված է Վիլյամ Սարոյանի պատումի վրա։ Երեկոյի ընթացքում հնչել է նաև THE99-ի տեխնո և ինդուստրիալ երաժշտությունը։
Փառատոնի ցուցադրությունները հունիսի 9-ից անցկացվում են Արվեստի Բաց Հարթակի կամերային կինոսրահում՝ Քաջազնունի 1 հասցեում։ Ծրագրում ընդգրկված է 109 ֆիլմ։ Փառատոնի շրջանակում նախատեսված են նաև վարպետության դասեր, հանդիպումներ, քննարկումներ և արվեստագետների միջև փորձի փոխանակում։
Այս տարվա ծրագիրը ներառում է երեք մրցութային անվանակարգ և արտամրցութային հատուկ ծրագրեր։ «ՄԷԿ ԿԱԴՐ ՄԷԿ ՐՈՊԵ» մրցութային անվանակարգում ներկայացված է 51 ֆիլմ։ Ժյուրիի նախագահն է կինոռեժիսոր, կինոգետ, պրոֆեսոր Գարեգին Զաքոյանը, ժյուրիի անդամներն են կինոռեժիսոր, XR միջավայրի ձևավորող Վահան Խաչատրյանը և կինոռեժիսոր, սցենարիստ, պրոդյուսեր Հարութ Մաքյանը։
«Կարճ ֆիլմեր» մրցութային անվանակարգում ընդգրկված է 23 ֆիլմ։ Ժյուրին նախագահում է Չեխիայի Հանրապետության արտակարգ և լիազոր դեսպան Հայաստանի Հանրապետությունում Պետր Պիրունչիկը։ Ժյուրիի կազմում են նաև Ուկրաինայից կինոգետ, դերասանուհի և ժամանակակից պարող Ֆլորա Բորովիկը և Եգիպտոսից վավերագրական ֆիլմերի ռեժիսոր, պրոդյուսեր Էսսամ Նագին։
«Կինո առանց սահմանի» մրցութային անվանակարգում ներկայացված է 21 ֆիլմ։ Այս անվանակարգի ժյուրին լրագրող, արվեստի քննադատ և մեդիա վերլուծաբան Նունե Հախվերդյանն է։ Հատուկ արտամրցութային ծրագրերում ընդգրկված է 14 ֆիլմ։
Փառատոնին մասնակցում են ֆիլմեր 18 երկրից՝ Հայաստանից, ԱՄՆ-ից, Գերմանիայից, Թաիլանդից, Իրանից, Իսպանիայից, Իտալիայից, Լեհաստանից, Խորվաթիայից, Հնդկաստանից, Միացյալ Թագավորությունից, Նորվեգիայից, Չինաստանից, Պաղեստինից, Պորտուգալիայից, Ռուսաստանից, Սերբիայից և Ֆրանսիայից։ Ամբողջական ծրագիրը կարող եք գտնել մեր Տելեգրամ ալիքում:
