Ֆիլմաստեղծ ու գրքաստեղծ ամերիկացիք ու եվրոպացիք՝ մոլագար սեր են տածում աշխարհից կտրված, գողտրիկ ու գեղատեսիլ գյուղերում, քաղաքներում ապրող ու իրենց հոգսերով տապակված բնակիչների իդեալական ու ծիսակարգի նման գծված կյանքը գլխիվայր շուռ տալու նկատմամբ: Է՜լ հսկայական մետեորիտ կգցեն ներքև, է՜լ Սուպերմեն Կանզաս կուղարկեն, է՜լ զոմբիներ… երեխա էլ կառևանգեն, հարյուր տարի առաջ մեռած մարդու դիակն էլ կապուտաչյա ծովի ափ կշպրտեն: Հա՛, ու էդ ամենը այնքան հավեսով կանեն, սյուժեն կլարեն, հետն էլ կստիպեն մեզ հետաձգել բոլոր գործերը ու հարմար տեղավորվել համակարգչի, հեռուստացույցի կամ թափանցիկ էկրանի առաջ: Ինչ խոսք, նրանց մոտ դա վարպետորեն է ստացվում…
Իսկ հիմա, եկեք մի պահ, իրար կողք շարենք անհամեմատելի ու իրարից հազար անգամ տարբեր, բայց կուլտային «Թվին Փիքսն» ու «Ֆարգոն», երկու հրաշագործությունների իրարամերժ ու խարիզմատիկ կերպարներին էլ՝ փոխարինենք հորմոնների ամենօրյա պայթյունից ցնցվող, չափազանց համակրելի պատանիներով: Արեցի՞նք, շատ լավ է, ունենք «Ռիվերդեյլ», ամերիկյան պատանեկական դրամա, հիմնված հոգեցունց Archie (Արչի) կոմիքսների վրա։
Իրականում՝ ոչ, 13 մասից բաղկացած թինեյջերական այս կիսադետեկտիվ, կիսամիստիկ, կիսառոմանտիկ, կիսախելահեղ սերիալը, էականորեն որևէ աղերս չունի ամերիկյան հեռուսատապատմության երկու լեգենդար դետեկտիվ էպոսների հետ, ոգեշնչված էլ չի նրանցով: Բայց հնարավոր էլ չի մերժել այն, որ մթնոլորտը, գործողությունների վայրը, կոնֆլիկտը, արկածները ու գաղտնիքը, որոնք հետապնդելու են դիտողին առաջին էպիզոդից մինչև գրանդիոզ ֆինալ, լավ էլ տեղափոխում է մեզ Փիքսի ու Ֆարգոյի աշխարհ: Ի դեպ, դիպաշարը հարուստ է ինտրիգներով, հարցերով ու պատասխաններով, սանձարձակ անմեղությամբ, երաժշտությամբ, լկտի լակոտներով, պահարաններում պահված կմախքներով, անհոգ ապրելաոճի ոչնչացմամբ, սիրային արկածներով… և վերջապես, ո՞վ է սպանել Ջեյսոնին:
Հետաքրքիր է իմանալ, որ ֆիլմաշարի առաջնախաղը տեղի է ունեցել 2017 թվականի հունվարի 26-ին, The CW ամերիկյան մալուխային հեռուստաընկերության եթերում, ապա՝ միջազգայնորեն տարածվել ամերիկյան վիդեոսթրիմինգի շնաձուկ՝ Netflix-ի կողմից: Սերիալի ցուցադրությունը համընկել է Archie կոմիքսների ստեղծման 75 ամյակի հետ: Ի ուրախություն երկրպագուների, նախորդ տարվա հոկտեմբերի 10-ից հեռուստաալիքը սկսեց հեռարձակել երրորդ եթերաշրջանը, որի վերջին երկու մասերը կցուցադրվեն հունվարին: Այնպես որ, հոգնատանջ երեկոները անցկացնելու լավագույն միջոցը չի ուշանա: Ու մենք կրկին կտեսնենք մռայլի ու երփներանգի խառնուրդ սիրասուն կադրեր, դեռահասներ, որոնք փորձում են գտնել իրենց տեղը տարօրինակ քաղաքում, ամեն քայլափոխի նոր ու սարսափազդու բացահայտումների բախվելով…
