Կաննի 79-րդ կինոփառատոնի օրերին անցկացվող Marché du Film-ում Ֆիլմարտադրողների համահայկական ֆեդերացիան ներկայացրել է հայկական հինգ կինոնախագիծ։ Այս մասին հայտնել է ռեժիսոր և պրոդյուսեր Հովհաննես Գալստյանը։
Ննախագծերի շնորհանդեսները նախատեսված էին՝ Palais -1-ում գտնվող Ֆեդերացիայի տաղավարում։ Ֆեդերացիան Կաննի կինոշուկա է վերադարձել որպես «Գագիկ Ծառուկյան» հիմնադրամի պաշտոնական գործընկեր՝ շարունակելով միջազգային հարթակներում հայկական ժամանակակից կինոն ներկայացնելու իր ծրագիրը։
Հինգ նախագիծ Կաննի կինոշուկայում
Կաննում ներկայացված նախագծերի շարքում են «Վերա», «Ճերմակ շապիկ», «Բարև», «Բեմ» և Overmind աշխատանքները։
«Վերա» նախագիծը հայ-եվրոպական համատեղ արտադրություն է, որում ներգրավված են Հայաստանի, Էստոնիայի, Չեխիայի, Լեհաստանի և Բելգիայի գործընկերներ։ Ֆիլմի պատմությունը կապված է Արցախի 2023 թվականի շրջափակման հետևանքով ստեղծված մարդկային իրավիճակի հետ։
«Ճերմակ շապիկ» ֆիլմը ներկայացվել է Monk3 ընկերության կողմից։ Նախագիծը սոցիալական դրամայի տարրերով պատմություն է հարուստ գործարարի որդու, պատասխանատվությունից խուսափելու փորձի և դրա հետևանքների մասին։
«Բարև» նախագիծը ներկայացվում է որպես Արա Գյուլերի մասին հայ-թուրքական համատեղ կենսագրական ֆիլմ։ Ֆիլմի կենտրոնում աշխարհահռչակ լուսանկարչի անձնական և ընտանեկան ճանապարհորդությունն է։
«Բեմ» ֆիլմը պատմում է բալետի աշխարհի մասին՝ կենտրոնանալով ստեղծագործական հավակնությունների, զոհաբերության, սիրո և մրցակցության վրա։
Overmind-ը արհեստական բանականության թեմայով նախագիծ է, որի առանձնահատկություններից մեկը ամբողջությամբ AI-ի միջոցով ստեղծված դերասանական կազմն է։
«Բացահայտիր Հայաստանը» և Cinema Alliance
Կինոնախագծերի ներկայացմանը հաջորդել է նաև «Բացահայտիր Հայաստանը Ֆիլմարտադրողների համահայկական ֆեդերացիայի հետ» նախաձեռնության շնորհանդեսը։ Ֆեդերացիան միջազգային գործընկերներին ներկայացրել է նաև Cinema Alliance նախաձեռնությունը, որը նախատեսված է Հայաստան եկող միջազգային կինոխմբերի աշխատանքը հեշտացնելու համար։
Ֆեդերացիայի ծրագրերում առանձնահատուկ տեղ է զբաղեցնում նաև Հայաստանի՝ որպես կինոարտադրության և մշակութային ուղղության առաջմղումը։ Այս համատեքստում Կաննում ներկայացվել է Հատիս լեռան վրա կառուցվող Հիսուս Քրիստոսի արձանի միջազգային տեղեկատվական արշավը։
Անդրադարձ Cannes Market News-ում
Cannes Market News-ի թողարկման մի քանի էջ նվիրված է եղել Հայաստանին, հայկական կինոարդյունաբերությանը, Կաննում ներկայացված նախագծերին, սփյուռքի հետ համագործակցությանը և Հայաստանի կինոարտադրական հնարավորություններին։
Հրապարակված հատվածներում շեշտվում են Հայաստանի կինոժառանգությունը, միջազգային համագործակցության հնարավորությունները, ինչպես նաև կինոարտադրության ոլորտում ներդրումների մասնակի վերադարձի ծրագիրը։ Հայաստանի cash rebate համակարգը նախատեսում է 25% վերադարձ՝ Հայաստանում կատարված որակավորվող ծախսերի համար, ինչպես նաև մինչև 10% հավելյալ վերադարձ՝ Հայաստանի հանրահռչակմանը նպաստող նախագծերի դեպքում։
Ֆեդերացիայի ներկայությունը Կաննում ներկայացվում է որպես հայկական ժամանակակից կինոն միջազգային շուկայի մասնագիտական միջավայրում տեսանելի դարձնելու հերթական փորձ։
