Կաննի 79-րդ միջազգային կինոփառատոնի կինոշուկայում՝ Վրաստանի ազգային տաղավարում, մայիսի 15-ին ստորագրվել է համագործակցության հուշագիր Վրաստանի ազգային կինոկենտրոնի և Հայաստանի կինոյի հիմնադրամի միջև։ Այս մասին հայտնում է Վրաստանի ազգային կինոկենտրոնը։
Հուշագիրը նախատեսում է երկու երկրների միջև կինոյի ոլորտում համագործակցության խորացում, համատեղ նախագծերի և ծրագրերի իրականացում, ինչպես նաև կինոարտադրության ոլորտում փորձի փոխանակում։
Փաստաթուղթը ստորագրել են Վրաստանի ազգային կինոկենտրոնի տնօրեն Մամուկա Բլիաձեն և Հայաստանի կինոյի հիմնադրամի տնօրեն Դավիթ Բանուչյանը։
Ըստ ներկայացված տեղեկատվության՝ համագործակցությունը կարող է ընդգրկել համատեղ ֆիլմարտադրության, փառատոնային կապերի, կրթական նախագծերի և մասնագիտական այլ նախաձեռնությունների ուղղությունները։
Վրացական կողմը հուշագրի ստորագրումը գնահատում է որպես Հայաստանի և Վրաստանի միջև կինոյի ոլորտում հարաբերությունների խորացման կարևոր քայլ։ Նշվում է, որ այն կարող է նոր հնարավորություններ ստեղծել երկու երկրների պրոդյուսերների և ռեժիսորների համար՝ համատեղ աշխատելու և ավելի սերտ մասնագիտական կապեր ձևավորելու նպատակով։
Այս փուլում կոնկրետ համատեղ նախագծերի կամ ծրագրերի մասին մանրամասներ չեն հրապարակվել։
