Մայիսի 23-ին Ֆրանսիայում տեղի է ունեցել Կաննի 79-րդ միջազգային կինոփառատոնի մրցանակաբաշխությունը։ Փառատոնի գլխավոր մրցանակին՝ «Ոսկե արմավենուն», արժանացել է ռումինացի ռեժիսոր Քրիստիան Մունջիուի «Ֆյորդ» դրաման։
Ֆիլմի գլխավոր դերերում հանդես են գալիս Ռենատե Ռեյնսվեն և Սեբաստիան Սթենը։ «Ֆյորդը» պատմում է Ռումինիայից Նորվեգիա տեղափոխված ընտանիքի մասին, որը նոր միջավայրում բախվում է մշակութային տարբերությունների, հասարակական ճնշման և փոխըմբռնման պակասի։
Սա Քրիստիան Մունջիուի երկրորդ «Ոսկե արմավենին» է։ Ռեժիսորը Կաննի գլխավոր մրցանակին առաջին անգամ արժանացել էր 2007 թվականին՝ «4 ամիս, 3 շաբաթ և 2 օր» ֆիլմի համար։
Կաննի 79-րդ կինոփառատոնի Գրան պրին ստացել է Անդրեյ Զվյագինցևի «Մինոտավրոս» ֆիլմը։ Ժյուրիի մրցանակը շնորհվել է Վալեսկա Գրիզեբախի «Երազված արկածը» ֆիլմին։
Լավագույն ռեժիսուրայի մրցանակը այս տարի բաժանվել է մի քանի հեղինակների միջև․ Պավել Պավլիկովսկին մրցանակի է արժանացել «Հայրենիք» ֆիլմի համար, իսկ Խավիեր Ամբրոսին և Խավիեր Կալվոն՝ «Սև գնդակ» ֆիլմի համար։
Լավագույն սցենարի մրցանակը ստացել է Էմանուել Մարեն՝ «Մեր փրկությունը» ֆիլմի համար։ Լավագույն դերասանուհու մրցանակը կիսել են Վիրժինի Էֆիրան և Տաո Օկամոտոն՝ Ռյուսուկե Համագուչիի «Հանկարծ» ֆիլմում դերակատարումների համար։
Լավագույն դերասանի մրցանակը շնորհվել է Վալենտին Կամպանին և Էմանուել Մակիային՝ Լուկաս Դոնտի «Վախկոտը» ֆիլմի համար։ «Ոսկե տեսախցիկ» մրցանակը՝ լավագույն դեբյուտի համար, ստացել է Մարի-Կլեմանտին Դյուսաբեժամբոյի «Աստծո զավակները» ֆիլմը։
Լավագույն կարճամետրաժ ֆիլմ է ճանաչվել Ֆեդերիկո Լուիս Տաչելլայի «For the Opponents»-ը։ FIPRESCI-ի մրցանակը հիմնական մրցույթում նույնպես շնորհվել է Քրիստիան Մունջիուի «Ֆյորդին»։
