Հայաստանի կինոյի հիմնադրամի պաշտոնական կայքում հայտնվել են ապրիլ և մայիս ամիսներին վերաբերող մի շարք հրապարակումներ, որոնք մայիսի 20-ի դրությամբ կայքի գլխավոր էջի «Նորություններ» բաժնում տեսանելի չէին։
«ԿինոՊրես»-ի դիտարկմամբ՝ Wayback Machine-ի՝ 2026 թվականի մայիսի 20-ին պահպանված տարբերակում Հայաստանի կինոյի հիմնադրամի կայքի «Նորություններ» բաժնում վերջին հրապարակումներից մեկը վերաբերում էր «Հայֆիլմ» կինոստուդիան ԿԳՄՍ նախարարությանը վերադարձնելու մասին նյութին։ Դրան հաջորդում էին հիմնականում մարտի և փետրվարի հրապարակումներ։
Մինչդեռ կայքի ներկայիս տարբերակում արդեն տեղադրված են ապրիլ-մայիս ամիսներին վերաբերող մի շարք նյութեր՝ «Սպիտակ Ոսկոր» ֆիլմի ցուցադրության, Հայաստանի կինոյի հիմնադրամի և Վրաստանի ազգային կինոկենտրոնի միջև Կաննի կինոշուկայում ստորագրված հուշագրի, Annecy Classics ծրագրում հայկական անիմացիայի ներկայացման, Cannes Classics բաժնում Արտավազդ Փելեշյանի ֆիլմերի ծրագրի, Cash Rebate-ին նվիրված տեղեկատվական հանդիպման, CinéFabrique կինոդպրոցի ներկայացուցիչների այցի և այլ թեմաների մասին։
Սակայն հենց Cannes Classics-ում Արտավազդ Փելեշյանի ֆիլմերի ներկայացման թեման ցույց է տալիս կայքի ընտրովի թարմացման խնդիրը։ Մայիսի 23-ին Հայաստանի կինոյի հիմնադրամը միայն Facebook-ի իր էջում հրապարակեց պարզաբանման և ներողության գրառում՝ կապված նախորդ հրապարակման մեջ Հայաստանի ազգային կինոկենտրոնի նախկին տնօրեն Շուշանիկ Միրզախանյանի ներդրումը պատշաճ կերպով չներկայացնելու հետ։
Այդ գրառմամբ հիմնադրամը կարևոր էր համարել հատուկ շնորհակալություն հայտնել Շուշանիկ Միրզախանյանին՝ նշելով նրա երկարամյա աշխատանքը հայկական կինոժառանգության հանրահռչակման և հայկական կինոյի միջազգային ներկայացման գործում։ Միևնույն ժամանակ հիմնադրամը ցավ էր հայտնել, որ նախորդ հրապարակման մեջ տեղի ունեցած սխալի հետևանքով պատշաճ կերպով չէր ներկայացվել նրա մասնագիտական ներդրումը։
Ավելին՝ հիմնադրամը նույն գրառմամբ տեղեկացրել էր, որ տվյալ հրապարակման կապակցությամբ կնշանակվի ծառայողական քննություն՝ պարզելու, թե ինչպես է թույլ տրվել նման հրապարակում, և որ պատասխանատու անձինք բացատրություններ կտան ու պատասխանատվություն կկրեն հիմնադրամի ներքին կարգերի շրջանակում։
Սակայն 2026 թվականի հունիսի 9-ի դրությամբ հիմնադրամը հրապարակային կերպով չի ներկայացրել, թե ինչ ընթացք է ստացել այդ ծառայողական քննությունը, ինչ հետևություններ են արվել և արդյոք որևէ պատասխանատվություն կիրառվել է։ Այս պարզաբանումը նույնպես տեղ չի գտել հիմնադրամի պաշտոնական կայքում՝ մնալով սոցիալական ցանցի մակարդակում։
Այսպիսով, խնդիրը միայն ուշացած թարմացումը չէ։ Հիմնադրամի հրապարակումներից շատերը բովանդակությամբ հիշեցնում են սոցիալական ցանցերում ավելի վաղ տարածված հաղորդագրություններ, որոնք հետագայում տեղափոխվել են պաշտոնական կայք։ Սակայն որոշ կարևոր պարզաբանումներ, այդ թվում՝ Փելեշյանի ֆիլմերի ներկայացման շուրջ առաջացած քննադատության վերաբերյալ գրառումը, այդպես էլ չեն դարձել պաշտոնական կայքի մաս։
Պաշտոնական կայքը սոցիալական ցանցի կրկնօրինակ չէ։ Այն հանրային հիշողության, հաշվետվողականության և ստուգելի տեղեկատվության հարթակ է։ Հատկապես այն կառույցի դեպքում, որը զբաղվում է պետական ֆինանսավորմամբ, մրցույթներով, ոլորտային ծրագրերով և հայկական կինոյի համար հանրային նշանակություն ունեցող գործընթացներով։
«ԿինոՊրես»-ը նախկինում բազմիցս հարցումներ է ուղարկել ինչպես Հայաստանի կինոյի հիմնադրամին, այնպես էլ ՀՀ կրթության, գիտության, մշակույթի և սպորտի նախարարությանը՝ փորձելով պարզել, թե ինչու է հիմնադրամի պաշտոնական կայքը վարվում այս ձևով, ինչ տեխնիկական խնդիրների մասին է խոսքը և երբ է նախատեսվում ապահովել կայքի լիարժեք ու կանոնավոր աշխատանքը։ Սակայն բովանդակային պատասխան չի ստացվել, որը կբացատրեր իրավիճակը կամ կներկայացներ խնդրի լուծման հստակ ժամկետներ։
Առավել մտահոգիչ է այն, որ 2026 թվականի հունիսի 9-ի դրությամբ Հայաստանի կինոյի հիմնադրամի կայքում դեռևս տեսանելի չէ ամբողջական տեղեկատվություն 2026 թվականի առաջին պետական ֆինանսավորման մրցույթի վերաբերյալ։ Կայքի «Հայտարարություն» բաժնում առաջինը երևում է ապրիլի 8-ի հայտարարությունը՝ ազգային ֆիլմերի նախագծերի պետական ֆինանսավորման մրցույթներին մասնակցող հայտերը գնահատող հանձնախմբերի անդամների թեկնածուների ցանկի համալրման մասին։ Սակայն 2026 թվականի առաջին մրցույթի մեկնարկի, ժամկետների, պայմանների կամ հայտերի ընդունման վերաբերյալ առանձին հրապարակում կայքում տեսանելի չէ։
Հիմնադրամի գործող կանոնակարգով, որը ընդունվել էր «Կինեմատոգրաֆիայի մասին» օրենքների պահանջներին հակառակ, մրցույթի մասին հայտարարությունը պետք է հրապարակվի ազգային մարմնի պաշտոնական կայքում, զանգվածային լրատվության այլ միջոցներով, ինչպես նաև Հայաստանի Հանրապետության հրապարակային ծանուցումների պաշտոնական ինտերնետային կայքում։ Այս ֆոնին կայքում մրցույթի վերաբերյալ ամբողջական տեղեկատվության բացակայությունը նոր հարցեր է առաջացնում ոլորտի մասնակիցների հավասար տեղեկացվածության և հանրային վերահսկողության տեսանկյունից։
Երբ պաշտոնական տեղեկությունը հրապարակվում է ուշացումով, ընտրովի և առանց բավարար բացատրության, ստեղծվում է փակության տպավորություն՝ հատկապես այն դեպքում, երբ կառույցը տնօրինում է պետական բյուջեից հատկացվող միջոցներ։ Հայաստանի կինոյի հիմնադրամի դեպքում սա այլևս միայն տեխնիկական հարց չէ, այլ հանրային հաղորդակցության և հաշվետվողականության խնդիր։
«ԿինոՊրես»-ը շարունակելու է հետևել Հայաստանի կինոյի հիմնադրամի պաշտոնական կայքի, մրցութային գործընթացների և պետական ֆինանսավորման վերաբերյալ հրապարակումների թափանցիկությանը։
