Սանկտ Պետերբուրգի Կրասնոգվարդեյսկի շրջանային դատարանը Ռուսաստանում արգելել է երեք արտասահմանյան ֆիլմ՝ Լուկա Գուադանինոյի «Կոչիր ինձ քո անունով» (Call Me by Your Name), Ջոն Կրոկիդասի «Սպանիր քո սիրելիներին» (Kill Your Darlings) և Գրեգ Բեռլանտիի «Սիրով, Սայմոն» (Love, Simon) ֆիլմերը։ Այս մասին հայտնում է «Коммерсантъ»-ը:
Ռուսական լրատվամիջոցների փոխանցմամբ՝ արգելքի հիմքում դրվել է այն ձևակերպումը, որ ֆիլմերում տարածվում է «դեստրուկտիվ գաղափարախոսություն», որը հակասում է Ռուսաստանի «ավանդական հոգևոր-բարոյական արժեքներին»։ Դատարանի հաղորդագրության մեջ նշվել է, որ համացանցում հայտնաբերվել են մի շարք հղումներ, որտեղ, ըստ ռուսական դատարանի, տեղադրված նյութերը կարող են հետաքրքրություն առաջացնել «ոչ ավանդական սեռական հարաբերությունների» նկատմամբ և փոխել դրանց հանդեպ բացասական վերաբերմունքը դրականի։
Դատարանի որոշումը ուժի մեջ է մտել անմիջապես։
Այս որոշումը տեղավորվում է Ռուսաստանում վերջին տարիներին ձևավորված ավելի լայն սահմանափակող քաղաքականության մեջ։ 2022 թվականից Ռուսաստանում ընդլայնվել են այսպես կոչված «ԼԳԲՏ քարոզչության» դեմ սահմանափակումները, իսկ 2023 թվականին Ռուսաստանի Գերագույն դատարանը «միջազգային ԼԳԲՏ շարժումը» ճանաչել է ծայրահեղական և արգելել դրա գործունեությունը երկրի տարածքում։ Դրանից հետո ԼԳԲՏ թեմայով կամ ԼԳԲՏ կերպարներ ներկայացնող մշակութային ու մեդիա բովանդակությունը Ռուսաստանում պարբերաբար հայտնվում է իրավական և վարչական ճնշումների դաշտում։
Արգելված ֆիլմերից ամենահայտնին Լուկա Գուադանինոյի «Կոչիր ինձ քո անունով» ռոմանտիկ դրաման է, որտեղ գլխավոր դերերից մեկը կատարել է Թիմոթի Շալամեն։ Ֆիլմը համաշխարհային ճանաչում է ստացել 2017 թվականին և արժանացել է «Օսկարի»՝ լավագույն ադապտացված սցենարի համար։ «Սպանիր քո սիրելիներին» ֆիլմը պատմում է ամերիկյան բիթ սերնդի գրական միջավայրի ձևավորման մասին, իսկ «Սիրով, Սայմոն»-ը պատանեկան դրամա է՝ ինքնության ընդունման թեմայով։ Վերջին երկու ֆիլմերը երբևէ չեն թողարկվել ռուսական կինոթատրոնային վարձույթում:
