«Ոսկե գլոբուս»-ը հայտարարել է Կովկասի և Կենտրոնական Ասիայի կինոյի ու հեռուստատեսության ոլորտի ստեղծագործական նվաճումներին նվիրված առաջին միջոցառման մասին։ Golden Globes Silk Road Tribute Gala-ն տեղի կունենա Ուզբեկստանում՝ 2026 թվականի հոկտեմբերի 23-ին և 24-ին։
Հունիսի 23-ին տարածված հաղորդագրության մեջ նշվում է, որ այս նախաձեռնությամբ «Ոսկե գլոբուսը» շարունակում է իր հանձնառությունը՝ արժևորելու կինոյի և հեռուստատեսության նշանակալի ձեռքբերումները տարբեր մշակութային միջավայրերում։
«Ոսկե գլոբուս»-ի նախագահ Հելեն Հոնը նշել է, որ կազմակերպությունը շարունակում է կարևորել գեղարվեստական բարձր որակը և պատմություններ պատմելու վարպետությունը։
«Կենտրոնական Ասիան և Կովկասը հարուստ ստեղծագործական ավանդույթների և նոր, ուշագրավ ձայների տուն են։ Մենք հպարտ ենք ճանաչելու այս պատմությունների հետևում կանգնած արվեստը և աջակցելու այն ստեղծագործողներին, որոնք դրանք ներկայացնում են համաշխարհային բեմում», — ասել է Հելեն Հոնը։
Միջոցառման կազմակերպումն ու ներկայացումը կիրականացնի Vivid Strategies-ը՝ «Ոսկե գլոբուսի» և տեղական գործընկեր Leto Productions-ի հետ համագործակցությամբ։ Golden Globes Silk Road Tribute Gala-ի ստեղծագործական զարգացման և տաղանդների հետ հարաբերությունների կառավարման աշխատանքներին կաջակցի Օրլանդո Ջոնը։
Նախաձեռնությունը նվիրված կլինի պատմական Մետաքսի ճանապարհի տարածաշրջանի կինոյի և հեռուստատեսության գործիչների ձեռքբերումներին՝ ընդգծելով Կովկասի և Կենտրոնական Ասիայի մշակութային ժառանգությունն ու ստեղծագործական փոխանակման երկարատև ավանդույթները։
Vivid Strategies-ի համահիմնադիր և գործընկեր Գիորգի Ռցխիլաձեն նախաձեռնությունը բնութագրել է որպես պատմական պահ տարածաշրջանի համար։
«Տասնամյակներ շարունակ Կենտրոնական Ասիայի և Կովկասի կինոգործիչները ստեղծել են բացառիկ աշխատանքներ, որոնք հաճախ տեսանելի չեն եղել համաշխարհային լսարանին։ Այս նախաձեռնությունը նոր ուղիներ է բացում ճանաչման, հնարավորությունների և միջազգային համագործակցության համար», — նշել է Ռցխիլաձեն։
Միջոցառման ծրագրի և պատվավոր մասնակիցների վերաբերյալ լրացուցիչ մանրամասները կհայտարարվեն ավելի ուշ։
